O‘zbekistonda 6ta bojxona posti tugatiladi

“Bojxona tartib-taomillarini soddalashtirish va davlat bojxona xizmati organlari tashkiliy tuzilmasini yanada takomillashtirish to‘g‘risida”gi prezident farmoni qabul qilindi.

Quyidagi hududlarda toifadan tashqari maqomga ega bo‘lgan “Masofaviy elektron deklaratsiyalash” bojxona postlari bosqichma-bosqich tashkil etiladi:

2021 yil 1 oktyabrdan Toshkent, Sirdaryo, Qashqadaryo va Xorazm viloyatlari bojxona boshqarmalarida;
2022 yil 1 apreldan boshqa hududiy boshqarmalarda.

Hududlardagi 6ta bojxona posti tugatiladi. Ular:

Qoraqalpog‘iston Respublikasidagi “Naymanko‘l” temir yo‘l chegara bojxona posti;
Qashqadaryo viloyatidagi “Qarshi tola” TIV bojxona posti;
Qashqadaryo viloyatidagi “Qarshi” temir yo‘l chegara bojxona posti;
Surxondaryo viloyatidagi “Amuzang” temir yo‘l chegara bojxona posti;
Farg‘ona viloyatidagi “Beshariq” temir yo‘l chegara bojxona posti;
Farg‘ona viloyatidagi “O‘qchi” chegara bojxona posti.

2021 yil 1 oktyabrdan “Masofaviy elektron deklaratsiyalash” postlari tashqi iqtisodiy faoliyat (TIF) ishtirokchilarining elektron bojxona yuk deklaratsiyalarini masofaviy rasmiylashtiradi.

2021 yil 1 dekabrdan “Masofaviy elektron deklaratsiyalash” Davlat chegarasi orqali avtomobil o‘tkazish punktlarida:

veterinariya va fitosanitariya organlarining hujjatlarini “Yagona darcha” bojxona axborot tizimi orqali tekshiradi;
veterinariya va fitosanitariya organlarining tovar-transport hujjatlariga muhr bosish va ro‘yxatga olish amaliyoti bekor qilinadi.

2022 yil 1 yanvardan:

ortiqcha to‘langan yoki undirilgan bojxona to‘lovlari TIF ishtirokchisiga 3 ish kuni davomida qaytariladi;
bojxona to‘lovlarini kechiktirib yoki bo‘lib-bo‘lib to‘lashning eng kam muddati 14 kun etib belgilanadi va ushbu muddatda foizlar undirilmaydi;
Davlat bojxona qo‘mitasi tizimida Markaziy bojxona laboratoriyasi tashkil etiladi.