Ijtimoiy xavfli ahvoldagi bolalar belgilangan ta’lim muassasasiga imtihonsiz qabul qilinadi

Tegishli farmonga muvofiq, ijtimoiy jihatdan xavfli ahvolda bo‘lgan bolalar ayrim belgilangan ta’lim tashkilotlariga Bolalar masalalari bo‘yicha tuman (shahar) komissiyasi qaroriga ko‘ra, Ijtimoiy himoya milliy agentligining yo‘llanmasi asosida joylashtirilishi mumkin.

Yo‘llanma asosida yuboriladigan mazkur toifadagi bolalar ta’lim tashkilotlariga bepul asosda, sinovlar va qo‘shimcha imtihonlarsiz qabul qilinadi.

Shuningdek, har o‘quv yili yakunida vazirlik va idoralar tomonidan tasarrufidagi ta’lim tashkilotlarining qabul kvotasi tasdiqlanishida ijtimoiy jihatdan xavfli ahvolda bo‘lgan bolalar uchun 5 foizgacha qo‘shimcha kvota ajratilishi belgilangan.

Bundan tashqari, Bolalar masalalari bo‘yicha milliy komissiya zimmasiga qo‘shimcha vazifalar yuklanmoqda. Xususan, bolalarni zo‘ravonlikning barcha shakllaridan himoya qilish bo‘yicha davlat organlari va tashkilotlari, shuningdek hududiy komissiyalar tomonidan ko‘rilayotgan choralarning natijadorligi o‘rganiladi.

Shu bilan birga, qo‘shimcha kvota asosida ta’lim tashkilotlariga qabul qilingan ijtimoiy jihatdan xavfli ahvolda bo‘lgan bolalarning xulq-atvori va o‘zlashtirishi tahlil qilib boriladi.