Davlat tashkilotlariga tegishli sanatoriylar xususiy sektorga sotiladi. Amaliyot Bo‘stonliqdan boshlanadi

Farmonga asosan, 2020 yil 1 noyabrdan boshlab Soliq kodeksi bilan berilgan quyidagi imtiyozlar bekor qilinadi.

a) Yer solig‘i bo‘yicha quyidagilar tomonidan egallangan yer uchastkalari:

• sog‘lomlashtirish hamda dam olish joylari, xususan dam olish uylari;
• aholining ommaviy dam olishi va turizm uchun joylar, agar ular tadbirkorlik faoliyati uchun ajratilgan bo‘lsa;
• sanatoriy-kurort obektlari, agar ular turistik zonalarda joylashgan bo‘lsa;

b) Mol-mulk solig‘i bo‘yicha sanatoriy-kurort xizmatlari ko‘rsatish uchun foydalaniladigan ko‘chmas mulk obektlari, agar ular turistik zonalarda joylashgan bo‘lsa.

Qoraqalpog‘iston Respublikasi Jo‘qorg‘i Kengesi hamda xalq deputatlari viloyatlar Kengashlariga turistik zonalarda alohida sanatoriy-kurort obektlari egallagan yerlar uchun mol-mulk va yer solig‘ining kamaytirilgan stavkalarini qo‘llash yoki ushbu soliqlarni to‘lashdan ozod qilish vakolati berildi.

2020 yil 1 sentyabrga qadar Toshkent viloyatining Bo‘stonliq tumanida joylashgan budjet tashkilotlari va davlat korxonalari, ustav fondida davlat ulushi 50 foiz va undan ortiq bo‘lgan yuridik shaxslarga tegishli bo‘lgan idoraviy dam olish uylari, pansionatlar,  sanatoriylar va boshqa obektlarni (bolalar dam olish lageridan tashqari) xususiy sektorga sotish bo‘yicha takliflar ishlab chiqiladi.

3 oy muddatda respublikaning boshqa hududlarida joylashgan shunga o‘xshash obektlarni ham xususiy sektorga sotish bo‘yicha takliflar tayyorlanadi.

2021 yil uchun Davlat budjeti loyihasini tayyorlashda respublikaning turistik zonalaridagi alohida yer uchastkalari, shu jumladan jismoniy shaxslar foydalanishida bo‘lgan 1 gektardan ortiq yer uchastkalari uchun mahalliy davlat hokimiyati organlari tomonidan yer solig‘ining 3 baravarigacha oshirilgan stavkasini belgilash ko‘zda tutiladi.