Jizzaxdagi xususiy bog‘chada basseynga cho‘kib o‘lgan bola ishi bo‘yicha hukm o‘qildi

Bog‘cha rahbari va tarbiyachisiga ozodlikni cheklash jazosi tayinlandi. Sud hukmi hali qonuniy kuchga kirmadi.

Foto: Ijtimoiy tarmoqlar

Jinoyat ishlari bo‘yicha Mirzacho‘l tumani sudi «Mehrli yulduz» xususiy bog‘chasida yuz bergan fojia – basseynga cho‘kib o‘lgan bola hodisasi bo‘yicha ochilgan jinoyat ishini ko‘rib chiqdi. 17 mart kuni chiqarilgan va Kun.uz tanishib chiqqan hukmga ko‘ra, bog‘cha rahbari Mavluda Yaqubova va tarbiyachisi Zilola Abilqosimovaga ozodlikni cheklash jazosi tayinlandi.

Hodisa 2025 yil 24 oktyabr kuni sodir bo‘lgan edi. Tushlik payti bolalarni ovqatlantirishga olib chiqishda 1,5 yoshli qizni yo‘qotib qo‘ygan tarbiyachi biroz o‘tib uni basseynga cho‘kkan holatda topgan. Holat yuzasidan Jinoyat kodeksining 116-moddasi (Kasb yuzasidan o‘z vazifalarini lozim darajada bajarmaslik) bilan jinoyat ishi qo‘zg‘atilgan edi.

Mirzacho‘l tumani sudi «Mehrli yulduz» xususiy bog‘chasi rahbari, 66 yoshli Mavluda Yaqubovaga 5 yil ozodlikni cheklash jazosini tayinladi va 20,6 mln so‘m jarimaga tortdi. Shuningdek, bog‘cha tarbiyachisi, 38 yoshli Zilola Abilqosimovaga 3 yil ozodlikni cheklash jazosini tayinladi.

Sud hukmi hali qonuniy kuchga kirmadi, tomonlar shikoyat qilishga, prokuror protest keltirishga haqli.