«Ichon-Qal’a» davlat muzey-qo‘riqxonasi hududida ayrim cheklovlar joriy qilinadi

Xorazm viloyati, Xiva shahrida joylashgan muzey-qo‘riqxonasiga 1 fevraldan boshlab tadbirkorlik sub’yektlari va korxona-tashkilotlarga tegishli transport vositalari kirishi taqiqlanadi.

Foto: KUN.UZ

Xalq deputatlari Xiva shahar kengashi tomonidan «Ichon-Qal’a» davlat muzey-qo‘riqxonasi hududida ayrim cheklovlar joriy etilishi haqida qaror qabul qilindi.

Jumladan, 1 fevraldan boshlab, «Ichon-Qal’a» hududida faoliyat olib borayotgan tadbirkorlik sub’yektlari va korxona-tashkilotlarga tegishli transport vositalari muzey-qo‘riqxona hududiga kiritilmaydi.

Bu chora-tadbir tarixiy hudud yo‘llari buzilishining va madaniy meros obektlari yemirilishining oldini olish hamda aholi bilan turistlarning erkin harakatlanishini ta’minlash maqsadida joriy qilinmoqda.

«Ichon-Qal’a» davlat muzey-qo‘riqxonasi hududida yashovchi aholi va tashkilotlarga tegishli avtomobillar uchun «Ota darvoza», «Bog‘cha darvoza», «Tosh darvoza» hamda «Polvon darvoza» hududiga yaqin joyda avtomobillar to‘xtash joylari tashkil qilinadi.