Sardoba suv omborini qayta quruvchi kompaniya tender orqali aniqlanadi

«Vazirlar Mahkamasi taklifi bilan qaror ishlab chiqildi. Unga ko‘ra, o‘pirilgan to‘g‘onni ta'mirlash, yetkazgan zararlar o‘rnini to‘ldirish ishlari «To‘palangsuvGESqurilish» MChJ va «O‘zbekiston temir yo‘llari» AJga yuklatilgan. Ular o‘zining hisobidan bu ishlarni amalga oshirmoqda. Bu – birinchi bosqichdagi ish. Bu ishlar uchun davlat budjetidan bir so‘m sarflanmayapti.

Keyingi bosqichda suv omborini qayta qurishga oid loyihalarimiz xalqaro ekspertizadan o‘tkazilganidan so‘ng tenderga qo‘yiladi. Tender shaffoflik asosida o‘tkaziladi va unda kim yutib chiqishini vaqt ko‘rsatadi.

Oldindan bir narsa deya olmaymiz. Qayta qurish jarayoni qachon boshlanishi ham aniq emas. Chunki to‘g‘onni qayta tiklash ancha vaqt oladi, buyog‘iga shoshilib bo‘lmaydi.

Hozir mavjud suvni ushlab turish uchun betondan to‘g‘on qilindi. Suv omborning tabiiy qozonchasida suv bo‘ladi, to‘g‘on qismigacha chiqmaydi. Suv kerak, hududdagi minglab gektar yerlarni sug‘orish kerak», deya qurilish vazirining so‘zlarini keltirmoqda Kun.uz muxbiri.

Botir Zokirov ikkinchi bosqichdagi ishlarni bajaradigan kompaniya tender orqali aniqlanishini ma'lum qilgan.

«Qurilish vazirligining asosiy maqsadi loyiha qurilishlarida haqiqiy raqobat muhitini tashkil etishimiz kerak. Endi «To‘palangsuvGESqurilish» MChJ haqida ham gapirsam, bu – ko‘zga ko‘ringan tashkilotlardan biri, Buxoroda yirik xalqaro loyihamiz bor, xorijiy mablag‘lar hisobiga quriladigan. O‘shanda «To‘palangsuvGESqurilish» MChJ 6-7ta chet ellik tashkilotlar orasida tenderni yutib chiqdi, sifati jihatdan ular olib borayotgan ishlarga mening e'tirozim yo‘q. Sal shoshilmaylik, hamma javoblar chiqadi, kim nima ayb qilgani», deya qo‘shimcha qildi u.

Suv xo‘jaligi vaziri Shavkat Hamroyev ham suv omborini kim qayta qurishi xalq bilan maslahatlashilishini, shundan so‘ng tender o‘tkazilishini ma'lum qilgan.

«Hamma obektlarni «To‘palangsuvGESqurilish» MChJ qurayotgani yo‘q. Masalan, Markaziy Farg‘ona suv ombori, Bulung‘urda suv ombor qurilyapti va ularni boshqalar quryapti. U yerda shaffof tenderlar bo‘ladi. Hozir tashkilotlarimiz texnikalar olyapti, tajriba orttiryapti, hozir tenderlar butunlay yangicha, shaffof bo‘ladi. Hatto tender a'zolari bilmaydi qaysi hujjat qaysi tashkilotniki ekanligini.

Hozir vaqtinchalik to‘g‘on bo‘ldi, u jarayonda «To‘palangsuvGESqurilish» MChJ qatnashdi. Lekin ikkinchi bosqichda shaffof tender bo‘ladi. Hali loyihaning o‘zi tugallanmagan, u tugallanadi, xalq bilan maslahatlashiladi, so‘ng tender bo‘ladi.

Yana bir masala, moliyalashtirish masalasida juda ko‘p qiyinchiliklar bo‘lgan. Shu obekt qurilishida ko‘p ishlarni birdaniga katta mablag‘ sarflab qilish kerak. «O‘zbekiston temir yo‘llari» kompaniyasi shunga qodir edi. Jarayonni qarasangiz ham doim biz buyurtmachi sifatida ulardan qarzdor bo‘lib turganmiz, ya'ni moliyalashtirish masalasida qiyinchilik», deydi Shavkat Hamroyev.