Shavkat Mirziyoyev Samarqandga tashrifini Imom Buxoriy maqbarasini ziyorat qilish bilan boshladi

Prezident Shavkat Mirziyoyev 28 may kuni Samarqandga tashrif buyurib, Imom Buxoriy maqbarasini ziyorat qildi. Qur’on oyatlari tilovat qilindi.

Ta’kidlanishicha, islom olamida Imom Buxoriyning hurmati yuksak, uning maqbarasini ko‘rish istagidagi insonlar ko‘p. Shu bois ziyoratchilarga sharoitlarni kengaytirish maqsadida bu yerda yangi majmua barpo etilmoqda. Prezident tashrif chog‘ida qurilishning borishini ko‘zdan kechirdi.

Majmuaning umumiy maydoni 44 gektar etib kengaytirilgan. Hozirgi kunda maqbara, 10 ming kishilik masjid, 4 ta minora qurib bitkazilgan.

Yangi majmua ziyorat bilan birga ma’rifat, tarbiya, ibrat o‘chog‘i bo‘ladi. Muzey, ma’muriyat, mehmonxona va boshqa xizmat ko‘rsatish binolarini o‘z ichiga oladi. Peshtoqlar va ayvon devorlariga Buxoriy hadislari bitiladi.

Davlat rahbariga majmuada bo‘lajak sharoitlar haqida axborot berildi. Maqbara hovlisi va xiyobonlarga ko‘proq daraxtlar ekish zarurligi aytildi.