28 iyul kuni Yozgi Olimpiadaning beshinchi kungi bahslari o‘tkaziladi. Ertangi bahslarda yana 4 nafar o‘zbekistonlik sportchi 2 sport turi bo‘yicha o‘z omadini sinab ko‘radi.
![](https://storage.kun.uz/source/7/UP6whX-OtBfzJD8iWC6FvBOO0Oio_GUG.jpg)
Shu kuni ikki nafar bokschi nimchorak final janglaridan ishtirokini boshlaydi, dzyudochilar jamoasidan bir erkak va bir ayol sportchi medallar uchun kurashib ko‘radi.
Soat 07:00da -70 kg vazn toifasida O‘zbekiston sharafini himoya qilayotgan dzyudochi Gulnoza Matniyozova tatamiga chiqadi. Uning ilk raqibi chadlik Demos Memnelum bo‘ladi.
Soat 07:45da esa O‘zbekiston dzyudo jamoasining medal uchun so‘nggi umidlaridan biri bo‘lmish Davlat Bobonov (-90 kg vazn toifasida) ishtirokini boshlaydi. Unga dastlabki jangida italiyalik Nikolas Mungay raqiblik qiladi.
Hozirga qadar Sharofiddin Lutfullayev (-60 kg), Sardor Nurillayev (-66 kg), Hikmatilloh To‘rayev (-73 kg), Sharofiddin Boltaboyev (-81 kg), Diyora Keldiyorova (-52 kg) va Farangiz Hojiyeva (-63 kg) turnirni tark etib bo‘ldi. Keyingi kunlarda Muhammadkarim Xurramov (-100 kg) va Bekmurod Oltiboyev (+100 kg) o‘z omadlarini sinab ko‘rishadi.
Boks jamoasining yana ikki vakili chorak final yo‘llanmasi uchun jang qiladi. Soat 8:40da -57 kg vazn toifasi vakili Mirazizbek Mirzaxalilov irlandiyalik Kurt Uolkerga qarshi ringga ko‘tariladi.
Soat 16:30da esa -81 kg vazn toifasida Dilshod Ro‘zmetov ozarboyjonlik Alfonso Domingesga qarshi jang boshlaydi.
Bu Dilshod Ro‘zmetovning Olimpiadadagi ikkinchi jangi bo‘ladi. U 1/16 finalda irlandiyalik Emmet Brennanni 5:0 hisobi bilan mag‘lub etgandi.
Bundan tashqari, Tursunoy Rahimova (+51 kg), Elnur Abduraimov (-63 kg), Shahobiddin Zoirov (-52 kg) va Fanat Qahramonov (-75 kg) ham ilk janglarda g‘alabaga erishib, 1/8 finalga chiqqandi. Bugun O‘zbekiston boks jamoasining yana bir vakili Bobo-Usmon Boturov (-69 kg) 1/4 final yo‘llanmasini hal qildi. Sanjar Tursunov (-91 kg) esa ilk raqibga mag‘lub bo‘lib, turnirni 1/16 finaldayoq tark etgandi. Shahnoza Yunusova (-69 kg) ilk jangda muvaffaqiyatsizlikka uchragan.
O‘zbekiston delegatsiyasining Olimpiada o‘yinlaridagi bayroqdori, +91 kg vazn toifasi vakili Bahodir Jalolov esa ishtirokini 29 iyul kuni boshlaydi. Shuningdek, -60 kg vazn toifasi vakili Rayhona Qodirova ham ilk jangiga tayyorlanmoqda.
O‘zbekiston delegatsiyasi hozircha bir oltin medal bilan umumiy reytingda 23-o‘rindan joy olib turibdi.