Mudofaa vazirligi qo‘l jangi bo‘yicha chempionat o‘tkazdi. Milliy gvardiya, MXX, MHSK va “Dinamo” jamoalari bellashdi 

Poytaxtning “JAR” sport-sog‘lomlashtirish majmuasida O‘zbekiston Respublikasi Qurolli Kuchlari tashkil etilganining 26 yilligi va Vatan himoyachilari kuni bayrami munosabati bilan Mudofaa vazirligi tomonidan qo‘l jangi bo‘yicha mamlakat Qurolli Kuchlari chempionati o‘tkazildi. Bu haqda KUN.UZ’ga Mudofaa vazirligi matbuot xizmati xabar berdi.

Musobaqada O‘zbekiston Respublikasi Mudofaa vazirligi, Milliy gvardiyasi, Milliy xavfsizlik xizmati, Markaziy harbiy sport klubi va “Dinamo” jismoniy tarbiya va sport klubi sportchilaridan iborat jamoalar 7 vazn toifasi bo‘yicha o‘zaro kuch sinashdi. 

Yakuniy natijalarga ko‘ra, umumjamoa hisobida Milliy gvardiya jamoasi birinchi, Markaziy harbiy sport klubi ikkinchi, Milliy xavfsizlik xizmati jamoasi uchinchi o‘rinni egalladi. Chempionatning g‘olib va sovrindorlari diplom, faxriy yorliq va esdalik sovg‘alari bilan taqdirlandi.

G‘olib va sovrindorlarni taqdirlash marosimida O‘zbekiston Respublikasi mudofaa vaziri general-mayor Abdusalom Azizov va Milliy gvardiya qo‘mondoni general-leytenant Bahodir Toshmatov ishtirok etdi.