Videoni ko‘rib yana bir bor g‘azablandik, kimdir so‘kindi. Ammo manzaraga yuqoriroqdan qarasak... Gap prokurordami? Undan aynan mana shu narsalar talab qilinsa, u nima qilishi kerak edi? Keling, masalaning bu tomoniga nazar tashlaylik.
O‘zbekiston prokurorlarga yuklangan va yuklanayotgan vazifalar bo‘yicha g‘oyat noyob mamlakat hisoblanadi. Hatto davlatning bosh mafkuraviy targ‘ibotchisi bo‘lgan “Axborot” ko‘rsatuvida prokurorning yer haydab ketayotgan traktor ortidan temir asbob ko‘tarib, haydov chuqurligini o‘lchayotgani aks etgan lavha ko‘rsatilgandi. Bu lavhani chet ellik kimdir ko‘rsa, miyasi g‘ovlab ketadi: prokuror va fermerning dalasidagi ishlar – bu ikkisining bir-biriga nima aloqasi bor?
Angrendagi holat. Prokuror maktabga o‘zicha bormagani aniq: u sektor rahbari hisoblanadi va boshqa sektor rahbarlari bilan yuribdi. O‘zidan talab qilingan vazifani bajarayotgani ham ayon, chunki ertaga kimdir shu maktabni tekshirsa, boshida kaltak sinadi. Ha, u “o‘tkazib yubordi”, so‘z tanlamadi, ammo u shunga o‘rgangan va videosi tarqalib ketib, “qahramon”ga aylanishini o‘ylamagan.
