Samarqand shahriga yangi prokuror tayinlandi

Samarqand shahri prokurori Boburmirzo Oblaqulov boshqa ishga o‘tgani munosabati bilan lavozimdan ozod etildi. Bu haqda shahar hokimligi matbuot xizmati xabar berdi.

Qayd etilishicha, Samarqand viloyati prokurori Murodqosim Eshnazarov va Samarqand shahar hokimi Fazliddin Umarov tomonidan jinoyatchilik hamda huquqbuzarliklarning oldini olish borasida amalga oshirilayotgan ishlar, qonunchilikka rioya qilish masalalariga bag‘ishlangan uchrashuv bo‘lib o‘tgan.

Unda viloyat prokurori ko‘p yillar shahar prokurori bo‘lib faoliyat olib borgan Boburmirzo Oblaqulov boshqa ishga o‘tganini ma’lum qilgan. Shu munosabat bilan Samarqand shahar prokurori etib tayinlangan adliya maslahatchisi Baxtiyor Normatovni jamoaga tanishtirgan.

Baxtiyor Normatov tayinlovga qadar Narpay tumani prokurori vazifasida faoliyat yuritgan.

Eslatib o‘tamiz, Boburmirzo Oblaqulov 2019—2022 yillar davomida Samarqand shahri hokimi lavozimida faoliyat yuritgan.