Санъат институти талабаси 5 кундан бери комада. Курсдошлар жанжали жиддий оқибатга олиб келди

Ҳолат бўйича Жаҳонгир Акрамовнинг отаси Одилжон Валиев Kun.uz'га мурожаат қилиб, ўғли Республика шошилинч тиббий ёрдам илмий марказида бир неча кундан бери ҳушсиз ётгани, айбдорлар ҳақида маълумот йўқлигини маълум қилди.

Ота ўғлининг касалхонага тушганини эшитгач, Россиядаги ишини ташлаб, 21 февраль куни Тошкентга етиб келганини айтмоқда.

«Ўғлим Ўзбекистон давлат санъат ва маданият институти 1-босқичида ўқийди. Мен Россияда ишлайман. Яқинларим ўғлимнинг оғир аҳволда касалхонага тушгани хабарини беришди. Шундан сўнг Тошкентга етиб келдим.

Ўғлим 20 февралдан бери кома ҳолатида ётибди. Шифокорларга раҳмат. Барча керакли муолажаларни қилишмоқда. Лекин ўғлимни ким урган, неча нафар бола бўлган – менга қоронғи.

Ҳозирча икки киши урганганини айтишмоқда. Лекин мен буни икки киши қилганига ишонолмаяпман. Aйбдорлар жазосини олиши керак», – дейди беморнинг отаси Одилжон Валиев.

Жаҳонгир Aкрамов ётган Республика шошилинч тиббий ёрдам илмий маркази Нейрохирургия бўлими шифокорлариларнинг айтишича, Жаҳонгир 19 февраль куни тез тиббий ёрдам марказига олиб келинган. Жароҳатлар жиддийлиги сабабли бу ҳақда ИИБга маълум қилинган.

Шифокорлар талаба кечаси соат 2:00ларда операция қилингани, керакли барча муолажалар олиб борилгани, бемор ҳамон кома ҳолатида эканини айтишди.

«Жаҳонгирга шикаст етказган болани танимаймиз, у бола бизнинг институт талабаси эмас» — институт кафедра мудири

Ҳолат бўйича изоҳ олиш учун Жаҳонгир Aкрамов таҳсил олаётган Ўзбекистон санъат ва маданият институтига бордик.

«Қўғирчоқ санъати» кафедраси мудири Aъзамжон Aбдухалиловнинг айтишича, Жаҳонгир билан уришган ва унга шикаст етказган бола институт талабаси эмас. Шунингдек, жанжал институт ҳудудида бўлмаган.

«19 февраль, жума куни тушлик вақтида жанжал ҳақида эшитдик. Жанжал институт ҳудудидан ташқарида бўлган. Мен кўчага чиққанимда Миллий гвардия машинасида Жаҳонгирни урган болани олиб кетишаётган эди.

Зудлик билан тез тиббий ёрдам чақиртирилди. Жаҳонгир касалхонага олиб борилаётган вақтда ҳушида бўлган, гапирган. Устозлари ва университет вакиллари бир неча кундан бери бориб, хабар олишмоқда.

Шундан сўнг тезда Жаҳонгирнинг яқинларига хабар бердик. Шу ерда ишлайдиган укаси келди. Жаҳонгирни урган бола бизнинг талаба эмас. Биз уни танимаймиз ҳам. Жаҳонгир билан олдин бунақа ҳолат бўлмаган. Дарсларда ҳам қувноқ ва фаол талаба эди», – деди кафедра мудири.

Ички ишлар бўлими профилактика катта инспектори: «Жаҳонгир эътирозим йўқ деб ёзиб берган»

Воқеа тафсилотларини ўрганган профилактика катта инспектори Равшан Қурбоналиев билан боғландик.

«Келишмовчилик дастлаб Жаҳонгир ва унинг курсдоши ўртасида бошланган. Жаҳонгир унинг юзига уриб, бурнини қонатган. Буни эшитган курсдошининг укаси институтга келиб, Жаҳонгирни ташқарига олиб чиққан.

Курсдошининг укаси ўзаро тортишув вақтида бехосдан Жаҳонгирни итариб юборган. Жаҳонгир боши билан ерга тушган. Орқа мияси шикастланган ва тез ёрдам машинаси билан шифохонага олиб борилган.

Мен ўзим шифохонада Жаҳонгир билан суҳбатлашдим. Aҳволи яхши эди. У «даъвойим йўқ» деб ёзиб берди. Буни видеотасвирга ҳам олганман. (Инспектор видеони кўрсатди, унда ҳақиқатан ҳам Жаҳонгир даъвоси йўқлигини айтган – таҳр.).

Жаҳонгир кома ҳолатига тушгандан сўнг буваси қайта ариза берди. Уни урган бола бундан олдин ҳам бир неча бор институтга кириб-чиқиб юрган. Сабаби, шу ерга ўқишга кириш учун дарсларга қатнашар экан. Биз бу бўйича қоровуллардан тушунтириш хатларини ҳам олдик.

У йигит бизнинг назоратимизда. Ҳар куни чақирилган вақтда олдимизга келиб кетади. Ҳозирда тергов органи суриштирув ишларини олиб боряпти.

Жаҳонгир ҳушига келса, тиббий экспертизадан ўтказилади. Ҳозир уни урган болани қамаб қўйишга ҳаққимиз йўқ. Суриштирув ишлари якунлангандан сўнг чора кўрилади», – дейди профилактика катта инспектори Равшан Қурбоналиев.

Кейинчалик Равшан Қурбоналиев билан қайта боғланганимизда ҳолат юзасидан жиноят иши қўзғатилганини маълум қилди.

Ёшлик – бебошликми?

Тўғри, айни 20 ёшда инсон қизиққон, оқибатини ўйламай иш қилишга мойил бўлиши табиий. Чунки ота-онаси ёки устозлари уларни доим ҳам орқасидан кузатиб юришларига вақти, имконияти йўқ.

Лекин оддий бир гапнинг ёхуд тушунмовчиликнинг орқасидан катта хатолар келиб чиқади. Бунда бир жон бутун умр ногирон бўлиб қолиши ёхуд бу оламни бевақт тарк этиши ҳам ҳеч гап эмас.

Бу ҳолат барчага, хусусан фарзанд ўстираётган ота-оналар, таълим муассасалари, ёшлар билан ишлаш ва жамоат тартиби учун масъул идоралар ходимларига сабоқ бўлади, деб умид қиламиз. Зеро, энг катта жиноят бу – бефарқлик.

Раҳматилло Исроилов