Lada XRay автомобили нархи маълум қилинди

Россиянинг “АвтоВАЗ” автоконцерни раҳбари янги Lada XRay автомобили нархларини эълон қилди. "Газета.ру" концерн президенти Бу Андерсон билан мулоқот ўтказган.

Президентнинг айтишича, янги моделнинг нархи 589 минг рублни ташкил этади.

Lada XRay автомобилини ишлаб чиқариш 15 декабрдан бошланди.

Lada Xray – SUV услубида ишланган компакт хетчбэк бўлиб, Lada’нинг янги Vesta’дан кейинги X-услубида ишланган иккинчи модели бўлди. Автомобиль Renault — Nissan альянси билан ҳамкорлик доирасида яратилган. Унинг таркибида 500дан ортиқ оригинал деталлар бор.

Classic асос версиясида иккита хавфсизлик ёстиқчаси, ABS тизими, курс барқарорлиги тизими, “ЭРА-ГЛОНАСС” шошилинч огоҳлантирув қурилмаси, аудиотизим ва 6 карнай (динамик) ҳамда марказий қулф ўрнатилади.

Автомобил бир қанча опцияларга эга. Ҳайдовчи ўриндиғини юқорига-пастга ростлаш, олд ойна, ўриндиқлар ва ташқи кўзгуларни иситиш мумкин. Ҳайдовчи ёнидаги ўриндиқ остида ғаладон, юкхона полида олинадиган қути, эҳтиёт ғилдирак ичида органайзер сингари ёрдамчи ашёлари бор.

Дастлаб, 114 от кучига эга 1,6 литрли агрегат, фурсати келиб навбатдаги русумларга 1,6 литрли (106 от кучи) ва 1,8 литрли (123 от кучи) моторлар ўрнатилади.

Бундан олдинроқ, ушбу автомобилнинг нархи тахминан 575-595 минг рубль бўлиши, у 2016 йил февралдан савдога чиқарилиши айтилганди.