Экология ва атроф-муҳитни муҳофаза қилиш давлат қўмитаси ҳамда Ички ишлар вазирлигининг тасдиқланган қўшма кўрсатмасига асосан, Тошкент шаҳрида 10 апрелдан 10 майга қадар "Тоза ҳаво" тадбирининг биринчи босқичи ўтказилиши режалаштирилган.
Тошкент шаҳар Экология ва атроф-муҳитни муҳофаза қилиш бошқармаси матбуот хизмати хабарига кўра, айни дамда пойтахт ҳудудига кириб келувчи 6та, яъни "Эркин", "А.Турбанов", "Шарқ", "Бектемир", "Келес" ва "Уч қаҳрамон" йўл-патрул хизмати масканларида ишлар олиб борилмоқда.
Қайд этилишича, давлат инспекторлари йўл-патрул хизмати ходимлари билан биргаликда пойтахтга кириб келувчи ҳамда чиқиб кетувчи автотранспорт воситаларидан атмосфера ҳавосига чиқарилаётган зарарли газлар миқдорини мунтазам равишда текшириб бормоқда.
Бир ой мобайнида давом этадиган мазкур тадбирда қайси автотранспорт воситасида зарарли газлар миқдори белгиланган меъёр даражасидан юқорилиги аниқланса, ҳайдовчисига нисбатан қонунда белгиланган тартибда чора кўрилиши айтилган.
Маълум қилинишича, Тошкент шаҳрига 6та йўл-патрул хизмати масканларидан бир кунда 100 мингдан ортиқроқ автотранспорт воситалари кириб чиқади. Айни дамда барча автотранспорт воситалари махсус қурилмалар ёрдамида назоратдан ўтказилмоқда.
