Ўзбекистон «спецнази» Дубайдаги мусобақада 1 та олтин медалини қўлга киритди

Бирлашган Араб Амирликларининг Дубай шаҳрида махсус кучлар ўртасида анъанавий UAE SWAT Challenge мусобақаси ўтказилди.

Турнир 5 кун давом этди. Ҳарбийлар тактика, штурм қилиш, офицерлар қутқаруви, минорани эгаллаш ва тўсиқлардан ўтиш каби мусобақаларда куч синашдилар.

Ўзбекистон ИИВ махсус кучлари гуруҳи турнирнинг 5-куни тўсиқлардан ўтиш мусобақасида 38 очко жамғариб, ғолибликни қўлга киритди. Иккинчи ўринни 37 очко билан Россиянинг «Ахмат», учинчи ўринни Қирғизистонинг «Қалқон» спецнази эгаллади.

Мусобақанинг биринчи кунида (тактика) Россиянинг «Ахмат» спецнази, иккинчи кунида (штурм) Дубай полицияси, учинчи кунида (офицерлар қутқаруви) Россиянинг «Ахмат» спецнази, тўртинчи кунида (минорани эгаллаш) Россиянинг «Витяз» спецнази ғалаба қозонди.

Умумий ҳисобда Россиянинг «Ахмат» спецнази 250 очко билан биринчи, Дубай полицияси 229 очко билан иккинчи, Россиянинг СОБР гуруҳи 216 очко билан учинчи бўлди. Ўзбекистон жамоаси юқори учликка кира олмади.

UAE SWAT Challenge 2023 — ҳуқуқни муҳофаза қилувчи махсус кучлар ўртасидаги норасмий жаҳон чемпионати. Бу йил унда 28 давлатдан 57 жамоа иштирок этди.