Фарғонада икки автомобил тўқнашиши оқибатида бир киши ҳалок бўлди

Фарғона вилоятининг Фарғона туманида йўл четида тўхтаган Cobalt кутилмаганда орқадан ҳаракатланиб келаётган бошқа бир Cobalt’нинг йўлига чиқиб кетди. Тўқнашув оқибатида йўловчилардан бири ҳалок бўлган.

Фарғона вилояти ИИБ матбуот хизмати хабарига кўра, ҳодиса 21 декабр куни соат 12:30 лар атрофида туманнинг Фарғона маҳалласидан ўтувчи Фарғона-Саторобод-Хонғиз автомобил йўлининг 6-километрида содир бўлган.

Cobalt Фарғона шаҳридан Хонғиз қишлоғи томон ҳаракатланиб кетаётган вақтида йўлнинг ўнг томонида тўхтаб, хавфсизлик чораларига амал қилмаган ҳолда чап томонга қайрилиб юборган. Натижада ўша йўналишда орқасидан келаётган яна бир Cobalt билан тўқнашув содир этган.

Йўловчилардан бири тан жароҳати олиб, туман марказий шифохонасига юборилган. Кўрсатилган муолажаларга қарамасдан, 52 ёшли фуқаро шифохонада вафот этган.

Ҳозирда ушбу ҳолат юзасидан терговга қадар текширув ҳаракатлари олиб борилмоқда.