Журналистлар «ГРУ» ва «Ҳавана синдроми» ҳолатлари ўртасидаги боғлиқликни аниқлади

Россия қуролли кучлари бош штаби бош бошқармасининг (собиқ «ГРУ») 29155-ҳарбий қисми ходимлари америкалик дипломатлар, амалдорлар ва разведка ходимларига «Ҳавана синдроми» деб аталган махфий қурол билан таъсир ўтказган бўлиши мумкин. Бундай хулосага The Insider нашри, Американинг CBS News телеканали «60 дақиқа» дастури ва Германиянинг Der Spiegel ҳафталик нашри журналистлари келган. Уларнинг суриштируви натижалари 1 апрел, душанба куни эълон қилинди. 

Россия ҳарбий разведкаси агентларининг сафарлари ҳақидаги маълумотларни дунё турли минтақаларида «Ҳавана синдроми» ҳолатлари билан таққослаб, журналистлар аниқ боғлиқликни аниқлади. Суриштирув шуни кўрсатдики, америкаликларда «Ҳавана синдроми» аломатлари худди шу даврларда ва 29155-қисм ходимлари келган жойларда пайдо бўлган. 

Хусусан, бош штаб бош бошқармаси агентларининг 2014 йилда Европа бўйлаб ҳаракатлари Франкфурт-Майндаги Америка консуллиги ходимларига нисбатан «қатор ғалати ҳужумлар»га тўғри келди. 2016-2017 йилларда Хитойда 29155-қисм агентлари гуруҳи келганидан сўнг, америкалик дипломатлар соғлиғида ғалати муаммолар ҳақида хабар беришни бошлаган. 2021 йилда 29155-қисм ходимлари жойлашган Гуржистонда америкалик дипломатнинг исми ошкор этилмаган рафиқасига Минора синдроми ташхиси қўйилган. 2021 йилда Белград ва Ханойда ҳам «ғалати тасодифлар» қайд этилган. 

Икки жабрланувчи ҳужумларда иштирок этгани тахмин қилинган шахсларни аниқлади 

«Ҳавана синдроми» аломатлари аниқланган икки эҳтимолий жабрланувчи фотосуратлар бўйича ҳужумларнинг эҳтимолий иштирокчиларини топди: улар Франкфурт-Майнда агент Егор Гордиенкони соғлиғи ёмонлашмасдан олдин, Тбилисида - қисм командири Андрей Аверяновнинг ўғли Алберт Аверяновни кўрган. 

Журналистлар, шунингдек, 29155-қисмнинг асосий аъзоларидан бири Иван Терентев томонидан «шаҳардаги ҳарбий (жанговар) операциялар пайтида ҳалокатли бўлмаган акустик қуролларнинг потенциал имкониятлари» бўйича тадқиқотини тасдиқловчи ҳужжатга эга экани айтилади. 

Россия ҳарбий разведкасининг «акустик қуроллар»дан фойдаланишга алоқадорлиги тўғрисида тўғридан тўғри далиллар мавжуд бўлмаса-да, энди «Америка расмийлари «Ҳавана синдроми»га бўлган муносабатини қайта кўриб чиқиши ва воқеаларни тўлиқ текширишни бошлаши мумкин», - дея хулоса қилган суриштирув муаллифлари.