«Бу ўзимизни ҳам чалғитяпти» – Кападзе мураббийлар „келди кетдиси“ ҳақида

Ўзбекистон миллий жамоаси бош мураббийи Тимур Кападзе Ўмонга қарши ўйиндан кейинги матбуот анжуманида иштирок этиб, миллий жамоада бош мураббий ўзгариши ҳақидаги хабарлар футболчиларни ҳам чалғитаётганини айтиб ўтди.

«Ўйин давомида голлар уриш учун имкониятларимиз бор эди, аммо улардан фойдалана олмадик. Умуман кўпроқ вазият яратсак бўларди. Ўзи умуман олганда, бу турнирдан ва 1-тур учрашувидан олдин бизда фақат иккита машғулот ўтказиш имкони бўлди. Кеча ва ундан аввалги кун тактик машғулот қила олдик. Ундан олдин эса тикланиш жараёни, қайсидир ўйинчи энди келди, бошқаси энди келади, деган нарса билан юрдик.

Араблар жамоаси қанчалик имконият берган бўлса, шундан фойдаланишга ҳаракат қилдик.

Кечирасизлар-у, ундан ташқари интернет тармоғидаям мураббийлар ҳақида „у келди, бу келди“ деган хабарлар. Футболчилар қандай „настрой“ қилади, ҳаммаси телефонда ўтиради, кузатади. Бу бизни ҳам чалғитяпти. Шунинг учун, икки кун ичида борича тайёргарлик кўрдик. Тайёр болалар билан чиқдик, йигитлар майдонда борини кўрсатишга интилди», – деди Кападзе ўйиндан кейинги матбуот анжуманида.

Ўзбекистон миллий жамоаси 30 август куни CAFA Nations Cup-2025 1-тури доирасида Ўмон билан дуранг ўйнади (1:1). Хорижда тўп сураётган легионерлар, жумладан, Элдор Шомуродов, Аббосбек Файзуллаев ва Жалолиддин Машарипов ҳозирча жамоа ихтиёрига етиб келмаган.

«А» гуруҳидаги иккинчи учрашувда ҳам Қирғизистон ва Туркманистон ўзаро дуранг ўйнади (1:1). Ўзбекистон кейинги ўйинни 2 сентябр куни соат 19:30 да Туркманистонга қарши ўтказади.

Сўнгги вақтларда Ўзбекистон миллий жамоаси бошқарувига хорижлик мураббий олиб келиниши ҳақида хабарлар чиқмоқда. Аввалига Ўзбекистон футбол ассоциацияси 2014 йил Германияни жаҳон чемпионига айлантирган Йоахим Лёв билан музокаралар олиб борган, якунда тажрибали мутахассис бу таклифни рад этганди.

Кейинроқ эса Ўзбекистонни 2026 йилги жаҳон чемпионатига ЎФА португалиялик мутахассис Паулу Бентуни миллий жамоа бош мураббийлигига асосий номзодлардан бири сифатида кўриб чиқаётгани ҳақида хабар тарқалди. Уни Тошкент аэропортида ҳам кўришган, аммо ҳозирча бу музокараларда силжиш йўқ.

Бенту турли йилларда Португалия ва Жанубий Корея миллий жамоаларига устозлик қилган, 2023-2025 йилларда БАА миллий жамоасини бошқариб, якунда ушбу жамоани ЖЧ-2026 мундиалига олиб чиқолмагач, истеъфога чиқарилганди.

Эслатиб ўтамиз, Тимур Кападзе жорий йил 22 январида Сречко Катанец ўрнига миллий жамоа бош мураббийи этиб тайинланганди. Кападзе бошқарувида жамоа 2026 йил АҚШ, Канада ва Мексика мезбонлигида ўтадиган жаҳон чемпионати саралашининг 3-босқичи доирасида ўз уйида Қирғизистонни мағлуб этди (1:0) ва меҳмонда Эрон билан дуранг ўйнади (2:2). Шунингдек, сафарда айнан Бенту бошчилигидаги БАА билан ўйинда дуранг ҳисобни сақлаб қолиб (0:0), ўз тарихида илк марта жаҳон чемпионатига чиқди.

Кападзе CAFA Nations Cup-2025 турнири арафасидаги матбуот анжуманида ҳам жамоага янги мураббий тайинланишига муносабат билдирганди. «Мураббий ким бўлишидан қатъи назар, терма жамоага мухлислик қилишимиз керак», деганди Кападзе. У бу мавзу кўп муҳокама қилиниши футболчиларга ҳам таъсир этиши мумкинлигини қайд этганди.