Муроджон Аҳмадалиев WBA камари учун жанг қилади

Профессионал бокснинг иккинчи ярим енгил (-55,34 кг) вазн тоифасида иштирок этаётган Муроджон Аҳмадалиев (6-0, 5 КО) WBA чемпионлик камари учун рингга чиқади.

Айни пайтда ушбу чемпионлик камари америкалик боксчи Даниэль Романга тегишли бўлиб турибди. Профи рингда «Кака» лақаби остида фаолият кўрсатаётган Муроджон Аҳмадалиев эса WBA Intercontinental камари соҳиби бўлиш билан бирга Романнинг чемпионлик камарига расмий даъвогар ҳам ҳисобланади.

GoSport.uz манбаси маълумотига кўра, Аҳмадалиевнинг мажбурий даъвогар сифатида чемпион Даниэл Романга қарши жанги бўйича промоутерлар келиша олишмаган. Натижада WBA промоутерлик савдоларини эълон қилган.

«Мир бокса» промоутерлик компанияси вакилларининг маълум қилишича, 2 июль куни промоутерлик савдолари бўлиб ўтади. Айнан шу куни кўпроқ пул таклиф қилган томон жангнинг муддати ва ўтказилиш жойини белгилаш имкониятига эга бўлади.

Промоутерлик савдоларининг бошланиши учун минимал сумма миқдори 120 минг АҚШ доллари этиб белгиланган. Бунда амалдаги чемпион Роман 75 фоиз маблағни гонарар сифатида қўлга киритса, 25 фоиз гонарар Муроджон Аҳмадалиевга берилади.

Қайд этиш керакки, бу гонарарларга ТВ-трансляция учун тўланадиган пуллар қўшилмаган.

Чемпионлик жанги август ёки сентябрь ойида ўтказилиши мумкин. Агар Муроджон Аҳмадалиев чемпионлик жангида ғалабага эришса, АҚШда чемпион бўлган илк ўзбекистонлик боксчига айланади.

Эслатиб ўтамиз, Муроджон Аҳмадалиев 2018 йилнинг 24 ноябрида Айзек Саратени мағлубиятга учратиб мазкур йўналиш чемпионлик камари учун мажбурий даъвогарга айланганди.

У профессионал рингдаги сўнгги жангини 2019 йилнинг апрелида мексикалик собиқ чемпион, жаҳон чемпионлиги камари даъвогари Карлос Карлсонга (23-6, 14 КО) қарши ўтказиб, 8 раундга мўлжалланган жангнинг 3-раундида нокаут эвазига ғалаба қозонганди.