Нега ўчирғич 2 хил рангда, тангаларда “тиш” ҳамда клавиатурада бўртмалар бўлади? Турли буюмлардаги биз билмаган қулайликлар

Кроссовкалардаги қўшимча тешиклар

Агар сиз тепасида қўшимча тешиклари бўлган кроссовкаларни кўриб қолсангиз, ажабланманг. Улар бекорга қилинмаган. Агар кроссовкани кийиб ипларини боғлаганингизда ноқулайлик ҳис қилсангиз ёки у оёғингизга ёпишиб турмаса, ўша қўшимча тешиклардан фойдаланасиз. Ипларни улардан ўтказиб, маҳкам боғлаб қўйсангиз, бу оёқ кийимингизда қулайроқ ҳаракатланиш имкониятини беради.

Жинсиларга кичик тугмалар

Агар жинси шимларга ёки бошқа кийимларга қарасангиз чўнтаклар атрофида кичик тугмачалар ўрнатилганини кўриш мумкин. Бу тугмачалар шунчаки фасон ёки мода учун қўйилмайди. Уларнинг ўз вазифаси бор. Гап шундаки жинси мато асосан пахта толасидан дағал ҳолда тўқилади ва четлари ёки чок атрофлари тез ситилиши мумкин.

Жинси кийимларни тез ситилишдан асраш учун уларнинг муҳим ва тез ситилиши мумкин бўлган чоклари олдига тугмачалар ўрнатилади. Жинсиларнинг муҳим чокларига бундай тугмачалар ўрнатишни жинси матосини биринчи ишлаб чиқарган америкалик афсонавий Леви Страусс ўйлаб топган эди.

Шарбат идишдаги қанотчалар

Агар сиз қоғоз идишга қадоқланган шарбатни сотиб олсангиз эътибор бериб қаранг, унинг тепаси икки ёнида иккита қанотчага ўхшаган қисми бор.

Шунчаки улар болалар учун шундай қилинади. Яъни ёш болалар идишдан шарбат ичаётганда идишни тушириб юбормаслиги ёки уни йиқилиб кетишдан асраш учун ўша қанотчаларни ушлаб олади.

Қулфлардаги кичик тешик

Агар сиз осма қулфларга диққат билан қарасангиз, уларнинг қарийб барчасида ост қисмида кичик бир тешик борлигини кўрасиз. Бу тешик ҳам бежизга қўйилмайди.

Гап шундаки, бу тешикча орқали очиқда қолган осма қулфлар ичига кирган сув чиқиб кетади. Бундан ташқари қулф занглаб қоладиган бўлса, шу тешикчадан унга мой қуйиб созланади.

Кўйлакларнинг орқа қисмидаги илмоқ

Айрим ёқали кўйлакларнинг орқа қисмида илмоқ тикиб қўйилган. Хўш, бу илмоқ нима вазифани бажаради? Унинг вазифаси оддий – кўйлакни кийим илгичга осонроқ илиб қўйиш.

Бу борада денгизчиларга миннатдорчилик билдиришимиз керак, чунки денгиз флотида улар илгакларга осиб қўйишни осонлаштириш учун кўйлакнинг орқа томонига илмоқ тикишган. Кейинчалик, 1960-йилларда, кўйлакларни ғижим бўлишдан асраш учун уларга илмоқ тикиш оммалашади. Ҳозирги кунда эса бундай илмоқлар кўйлакларнинг юқори даражада сифатли тикилганини англатади.

Голф тўпларидаги чуқурчалар

Кўпчилик голф тўпчаларини катта теннис тўпчаларига ўхшатади. Бироқ бундай эмас. Ҳатто гол тўпчаларининг сирти ҳам текис эмас. Унинг юза қисми бир хил ўлчамда бўлган кичик чуқурчалардан иборат. Хўш, нега голф тўпчаларининг сирти чуқурчалардан иборат?

Гап шундаки, бир пайтлар айрим голфчилар зарба берилган пайтда сирти текис тўпчаларга қараганда сирти чуқурча ва дағал бўлган тўпчалар узоқроқ учиб боришини пайқашган. Шундан сўнг барча голф тўпчаларининг сирти чуқурчалардан иборат қилиб ясала бошланган.

Телефонларнинг орқа камераси ёнидаги тешикча

Агар сиз iPhone телефонларига эътибор бериб қарасангиз, орқа камералари ёнида кичик тешик бор. Бу тешиклар ҳақида турли гаплар юради. Эмишки АҚШ махфий хизматлари ана шу тешикча орқали телефонни кўтариб юрган одамни кузатармиш.

Бошқа миш-мишларга кўра тешикча айғоқчилик учун ўрнатилган ва у орқали америкаликлар дунёнинг турли чеккаларини пойлашади. Булар бўлмаган гаплар. Аслида тешикча шунчаки микрофон учун ўрнатилган. Яъни iPhone телефонларининг микрофони ўша тешикчага ўрнатилган. Ҳар бир смартфонда учта микрофон ўрнатилган. Уларнинг бири телефон корпусининг пастки қисмида, бири динамик панжара остида ва бири камера ёнида.

Икки хил рангдаги ўчирғичлар

Болаликдан биламиз ўчирғичлар негадир асосан икки хил рангда бўлади. Хўш, нега уни яхлит бир хил рангда чиқаришмайди? Бунинг сабаби оддий.

Битта ўчирғичнинг икки ёни турлича – дағал ва юмшоқ қилиб ишлаб чиқарилади. Дағал томони дағал қоғозлардаги, юмшоқ томони майин қоғозлардаги ёзувларни ўчириш учун ишлатилади. Шунда уларнинг дағал ва юмшоқ томони фарқ қилиб туриши учун икки хил рангда ишлаб чиқарилади.

Нима учун эшикларнинг тутқичлари мисдан ясалади?

Ҳар куни бир неча мартадан мис тутқичлардан фойдаланасиз, лекин сизда бирон марта нега аксарият эшик тутқичлари мисдан ясалади деган савол пайдо бўлмаган. Чунки бу учун бошингизни қотириб ўтирмагансиз.

Гап шундаки, мис турли бактерияларга нисбатан анча чидамли ва микробларни йўқ қилиш хусусиятига эга. Эшик тутқичи кетма кет жуда кўп одам томонидан ушланади. Ана шу пайтда миснинг ноёб хусусияти туфайли микроблар одамларнинг қўлларига ўтиб кетмайди.

Иллюминаторлардаги кичик тешиклар

Агар сиз самолётда учган бўлсангиз, иллюминаторда кичик тешикларни кўрган бўлишингиз керак. Мабодо эътибор бермаган ва кўрмаган бўлсангиз, улар бор. Бироқ ваҳимага тушишга ҳожат йўқ. Бу тешикларнинг ҳам ўз вазифаси бор.

Улар ҳаво алмашиш учун шундай қилинган. Чунки самолёт ҳавога кўтарилганда унинг салонида босим пасаяди. Ана шунда махсус тешикча салондаги босимни хавфсиз ва қулай даражада ушлаб туришга ёрдам беради. Бу тешикча ҳатто самолётда босим пасайиб кетишининг олдини олишда ҳам асқатади.

Нега тангалар “тишли” қилиб ясалади?

Аксарият давлатларда зарб этиладиган йирик қийматдаги танга пуллар чети текис эмас ва у ерда кичик “тишлар” очилганини кўриш мумкин. Бунинг сабаби шундаки, тангаларнинг ҳақиқий қийматини акс эттириш учун ҳар хил оғирликларда қуйилади. Одамлар тангаларнинг четларини кесиб, сўнг уларни эритиб, янги сохта танга қилиб қўймасликлари учун “тишлар” очилади.

Клавиатуралардаги кичик бўртма

Агар сиз ҳозир компютер ёки ноутбукдан фойдаланиб ўтирган бўлсангиз, клавиатурага қаранг, F ҳамда J ҳарфлари жойлашган тугмаларда иккита кичик бўртма чизиқ бор. Хўш, нега айнан иккита ҳарфда бўртма чизиқ қилинган?

Бу чизиқлар компютер ёки ноутбукдан фойдаланувчиларга қулай бўлиши учун қилинган. Яъни тез ёзиш учун қўллардаги иккита бармоқ айнан бўртма чизиқ қилинган F ҳамда J ҳарфларини мўлжал олади ва бу клавиатурадан фойдаланишни анча осонлаштиради.

Кийимлар орасидаги бир парча мато нега керак?

Кийим-кечак сотиб олганимизда, баъзиларининг ичида елим пакетчага солинган кичик мато бўлаги чиқади. Кўпчилик буни кийим йиртилганда ямоқ сифатида ишлатиш учун қўйилган деб ўйлайди.

Тўғри, ўша мато бўлакларини ямоқ сифатида ҳам ишлатиш мумкин. Лекин уларнинг вазифаси аслида бошқа. Тикувчи корхона шунчаки кийимни ювишдан аввал ўша кичик мато бўлагини ювиб, синаб кўришингиз учун уларни қўшиб беради.

Қувватлантиргичга махсус мослама нега қўйилади?

Эҳтимол, сиз ноутбукингизни қувватлантирувчи кабелнинг охирида катта цилиндрсимон мосламани пайқагандирсиз. Аслида кераксиздай туюлган бу нарсанинг ҳам ўз вазифаси бор.

Бундай цилиндирсимон мослама ҳар қандай электромагнит шовқинларнинг олдини олишга ёрдам беради. Мисол учун, мобил телефонда гаплашаётганингизда мослама яқин атрофдаги шовқинларни тутиб қолади.

Машина ўриндиғидаги ёстиқчанинг бошқа вазифаси

Машиналар ўриндиқлари тепасига ўрнатилган ёстиқчани чиқариб олиш мумкинлигини биласиз. Ундан яна бир мақсадда фойдаланса бўлади. Агар машина билан қандайдир фавқулодда вазият юз берса ва у тўсатдан қулфланиб қолса ўша ёстиқчани чиқариб олиб, унинг ёрдамида ойналарни осонгина синдирса бўлади.

Бундай вазиятда зинҳор ойналарни қўл билан синдиришга уринманг. Чунки улар қўл билан зарба берилганда синмаслиги мумкин. Синган тақдирда ҳам қўлингизни жароҳатлаб олишингиз аниқ.

 

Пластик идиш қопқоқларидан тўғри фойдаланишни биласизми?

Бир марта фойдаланса бўладиган пластик идишларнинг қопқоқлари асосан овқат тўкилмаслиги учун ишлатилади. Бироқ унинг яна бир хусусияти бор ва буни кўпчилик билмайди.

Диққат билан эътибор берилса, пластик идиш остида учта бўртма, қопқоқда эса учта ёриқ борлигини кўриш мумкин. Идишдаги бўртма қопқоқдаги ёриққа тушади. Сиз овқатланаётганингизда ундан идиш остига қўйиладиган сифатида фойдаланишингиз мумкин.

Тиш пастаси қадоғидаги рангли квадратлар

Агар сиз тиш пастангиз идишининг қадоғига эътибор бериб унинг пастки қисмида кичик рангли квадратларни кўрасиз. Одатда, улар қора, яшил, қизил ёки кўк рангларда бўлади.

Бу квадратчалар тиш ювишга ёки тиш пастасининг турига алоқаси йўқ. Шунчаки улар аслида конвейердаги машиналар учун белги ҳисобланади. Ускуна пастани қадоқлаш жараёнида қадоқнинг қаеридан кесиш ва остини буклашни шу квадратчаларга қараб мўлжал олади.

Ручка қопқоғидаги тешик нега керак?

Шарикли ручкаларга қарасангиз, уларнинг қопқоғи учида кичик бир тешик бор. Бундай тешиклардан кирадиган ҳаво туфайли узоқ вақт ишлатилмаган ручкалардаги ранг қуриб қолиши мумкин. Унда нега қопқоқларга тешик қўйилади?

Бунинг сабаби шундаки ёш болалар ёки мактабнинг бошланғич синфларида ўқийдиганлар, ҳатто катталар ҳам ручка қопқоғини оғизга тиқиб туришади. Ана шундай пайтда қопқоқ томоққа тиқилиб қолса, уни чиқариб олгунча одам бўғилиб ўлиб қолмаслиги ва камроқ бўлса ҳам нафас олиб туриши учун тешик қўйилади.

Микротўлқинли печлардаги қора тўр

Агар сиз микротўлқинли печни мунтазам равишда ишлатсангиз, ҳеч бўлмаганда бир марта нега унинг эшигида қора тўр борлигига қизиқиб кўргансиз. Бунинг ҳеч қандай сири йўқ.

Микротўлқинли печлар ўзидан кучли электромагнит чиқаради. Одамларни ана ўша электромагнит майдонларидан ҳимоя қилиш учун микротўлқинли печлар эшиги қора тўрли қилиб чиқарилади.

Ботинкалардаги илмоқ нега керак?

Оёқ кийим танлаётганингизда эътибор берсангиз айрим ботинкалар ва этикларнинг тепа қисми орқа томонига илмоқ тикиб қўйилган. Ишлаб чиқарувчилар ҳеч бир детални бекорга қилмаслигини инобатга оладиган бўлсак, демак ўша илмоқлар ҳам нимадир вазифани бажаради.

Бунинг ҳеч қандай сири йўқ ва илмоқлар асосан ҳарбий (милитари) услубда тикилган қўнжи узун оёқ кийимларида бўлади. Бундай оёқ кийимларни кияётганда асосан ўша илмоқлардан ушлаб тортилади. Бундан ташқари, илмоқлар оёқ кийимни осиб қўйишда ҳам ишлатилади.

Соч учун шампун кондиционердан тўғри фойдаланиш қоидаси

Шампун ишлатаётганда, сочлардаги ёғ ва кирдан қутулиш учун бош терисини ҳам массаж қилиш керак бўлади. Шунда шампун сочлардаги ёғ билан бирга бош терисидаги кир ва ёғни ҳам тозалайди. Бироқ соч ювиш учун чиқарилган шампун кондиционерни бу тарзда ишлатмаслик керак.

Кўпчилик шампун кондиционерни сочлари билан бирга бошига ҳам суртади. Бу нотўғри. Уни бош терисига теккизмаган ҳолда фақат сочларнинг ўзига қўллаш керак. Бунинг сабаби, шампун кондиционер ўзи шундоқ ҳам ёғли бўлган соч илдизларини баттар ёғли қилади. Натижада бош териси остида ва сиртида янада кўпроқ ёғ йиғила бошлайди.

Блендердан тўғри фойдаланиш қандай бўлади?

Кўпчилик блендерда нимадир тайёрламоқчи бўлса, унга барча масаллиқларни тартибсиз равишда ташлайди ва аралаштиради. Бундай пайтда айрим қаттиқроқ нарсалар охиригача майдаланмаслиги ва кичик бўлакча ҳолида қолиб кетиши мумкин.

Тайёрланадиган нарса кўнгилдагидай бўлиши учун блендерга аввал суюқ нарсаларни, сўнг тепа қисмига қаттиқ нарсаларни ташлаш керак. Шунда блендер барча нарсани яхши янчади ва кичик бўлакчалар қолдирмайди.

Ғайрат Йўлдош тайёрлади