Яраланганлар ва бедарак йўқолганлар ҳам бор.
24 июн куни Жанубий Кореядаги литий батареялари ишлаб чиқариладиган заводда чиққан ёнғин камида 22 кишини ҳаётдан олиб кетди.
Ёнғин душанба куни тонгда Сеулдан тахминан 45 км жанубда жойлашган Ҳвасонг шаҳридаги Aricell заводида батареялар портлашидан бошланган.
Маҳаллий телевидение эълон қилган кадрларда тутун булути ва кичик портлашларни кўриш мумкин, портлашлар ўт ўчирувчилар етиб келиб, ишлаётганида ҳам давом этган. Бино томининг бир қисми қулаб тушган.
Жанубий Корея дунёда литий батареялари ишлаб чиқаришда етакчи ҳисобланади. Улар кўплаб маҳсулотларда — электромобиллардан тортиб ноутбукларни ясашда фойдаланилади.
Ўт ўчириш хизмати вакили Ким Жин Ён қурбонларнинг 18 нафари Хитой фуқаролари эканини маълум қилган, яна бир лаослик ва икки нафар жанубий кореялик ишчи ҳам ҳалок бўлган. Ҳозирча барча жасадларнинг ҳам шахсига аниқлик киритилмаган. Шунингдек, камида яна бир киши бедарак йўқолган деб ҳисобланмоқда.
«Ҳалок бўлганларнинг кўпчилиги кучли даражада куйиб кетган, шу туфайли ҳар бир кишини таниш учун маълум вақт кетади», — дея Кимнинг сўзларини келтирган AFP агентлиги.
Яна саккиз киши жароҳатланган, шундан икки нафари — оғир аҳволда. Ёнғин бошланганида бино ҳудудида жами 100 га яқин киши бўлган.
Мутахассисларнинг сўзларига кўра, батареялар ва аккумуляторлар ёниши ёнғиннинг ўта мураккаб шаклига олиб келади, бундай ҳолатда аланга тез тарқалади ва одамларни қутқариш учун вақт фавқулодда кам бўлади.
«Аккумуляторлар учун хомашё, масалан, никел, жуда тез аланга олади. Бошқа материллар туфайли келиб чиққан ёнғинлар билан таққослаганда, бундай ёнғин содир бўлганда, кўпинча реакция учун вақт етарли бўлмайди», — дея вазиятни изоҳлаган Тэжон университети ёнғинлар ва табиий офатлар олдини олиш соҳаси бўйича профессори Ким Жэ Ҳо Reuters агентлиги билан суҳбатда.
У ишчиларда ўзини қутқариш учун вақт жуда кам бўлганини таъкидлаган.
Бундай ёнғинларни қум билан ўчиришга тўғри келади, чунки сув литий билан реакцияга киришади. Ўт ўчирувчилар ёнғинни тўлиқ ўчиришига беш соат кетган.
Ёнғин бошланганида Aricell заводининг иккинчи қаватида текширувдан ўтказиш ва қадоқлаш учун тайёрлаб қўйилган 35 мингга яқин аккумулятор элементлари сақланаётганди.
Ким Жин Ённинг сўзларига кўра, ёнғин улардан бир қанчаси портлаши оқибатида келиб чиққан.
Портлашга айнан сабаб бўлгани ҳозирча аниқ эмас, аммо мутахассисларнинг тушунтиришича, литий батареялари шикастланганида ёки қизиб кетганида портлаши мумкин.
