Балашихадаги ётоқхонада юз берган ёнғинда беш киши ҳалок бўлди

Москва яқинидаги Балашиха шаҳрида 29 июн, шанбага ўтар кечаси Керамическая кўчасидаги икки қаватли ётоқхона ёниб кетди. Расмийларнинг маълум қилишича, бир неча соат давом этган ёнғин оқибатида беш киши ҳалок бўлган. 

«Керамик микрорайонида бугун тунда икки қаватли турар жой биносида ёнғин содир бўлди, айни дамда ёнғин тўлиқ ўчирилди», — деб ёзди шаҳар округи раҳбари Сергей Юров Telegram-каналида. Унга кўра, аҳоли эвакуация қилинган, жабрланганларга ёрдам кўрсатилмоқда. 

Россия Фавқулодда вазиятлар вазирлигининг «Интерфакс»га таяниб хабар беришича, ёнғин оқибатида беш киши қурбон бўлган. Ёнғин майдони 40 квадрат метрни ташкил этган. Ёнғинни ўчиришга 63 нафар қутқарувчи ва 23 дона техника жалб қилинган.

Ёнғинга электр симларидаги носозлик сабаб бўлган бўлиши мумкин

Фавқулодда вазиятлар хизмати агентликка содир бўлган воқеанинг бир нечта версиялари кўриб чиқилаётганини, «асосийлари орасида симлар ва электр жиҳозларининг носозлиги, шунингдек, фуқаролардан бирининг олов билан эҳтиётсиз муносабатда бўлгани» борлигини айтди. 

Россия Федерацияси Тергов қўмитасининг Москва вилояти бошқармаси эҳтиётсизлик оқибатида ўлимга сабаб бўлиш (Россия Федерацияси Жиноят кодексининг 109-моддаси) моддаси бўйича жиноий иш қўзғатилганини маълум қилди.