Полшалик журналистлар Трамп Путинга айнан нима таклиф қилаётганидан хабар топди

Полшадаги Onet.pl нашри АҚШнинг Россия-Украина урушини ҳал қилиш режаси тафсилотларини эълон қилди. Журналистлардаги маълумотларга кўра, 6 август куни Москвада Владимир Путин ва Стив Уиткофф ўртасида бўлиб ўтган учрашувда Кремл Доналд Трамп маъмуриятидан европалик иттифоқчилар билан келишилган «жуда фойдали таклиф» олган.

Бу таклиф қуйидагиларни ўз ичига олади:

1. ўт очишни тўхтатиш (лекин тинчлик битими эмас);
2. Россиянинг Украинада босиб олинган ҳудудлар устидан назоратини амалда тан олиш (бу масалани 49 ёки 99 йилга кечиктириш билан);
3. Россияга қарши аксарият санкцияларни бекор қилиш, узоқ муддатли истиқболда эса энергетика соҳасидаги ҳамкорликни ҳамда Россия гази ва нефти импортини қайта тиклаш.

Шу билан бирга, таклифлар пакетида НАТОни кенгайтиришдан бош тортиш ва Украинани ҳарбий қўллаб-қувватлашни тўхтатиш бўйича кафолатлар йўқ. Таъкидланишича, Россия томони охирги бандга рози бўлган.

Полшалик журналистлар бу маълумот манбасини келтирмаган. Можаро томонлари бу маълумотларга расман изоҳ бермаган. Трамп Путиннинг Кремлда Уиткофф билан учрашувидан кейин европалик иттифоқчилари билан ўз режалари ҳақида гаплашгани маълум.

Стив Уиткофф Доналд Трамп Кремлга Украинадаги ҳарбий ҳаракатларни тўхтатиш бўйича ултиматум қўйишидан икки кун олдин Москвага ташриф буюрди. Агар муддатга риоя қилинмаса, АҚШ президенти Россиядан нефт сотиб олувчи мамлакатларга нисбатан бож жорий этишга ваъда берганди.

Владимир Путин ва Стив Уиткоффнинг Кремлда бўлиб ўтган учрашувдан кейин Трамп келаси ҳафта, 11-17 август кунлари оралиғида Россия ва Украина президентлари иштирокида уч томонлама музокаралар ўтказиш ниятида эканини маълум қилди. Кремл Путин ва Трампнинг учрашувини яқин кунларда ўтказишга келишиб олганини тасдиқлади. РФ президенти бўлажак учрашув учун муносиб жойлардан бири сифатида Бирлашган Араб Амирликларини кўрсатди. У, шунингдек, умуман олганда, Володимир Зеленский билан учрашишга қарши эмаслиги, аммо бунинг учун шароит яратилиши кераклиги, бунга эса ҳали анча борлигини қўшимча қилди.

Аввалроқ Bloomberg ҳам ўз манбаларига таяниб, Трамп Путин билан учрашувда ўт очишни тўхтатиш ва «ҳудудларни алмашиш масаласи»ни муҳокама қилиш ниятида эканини тасдиқлаганди. Бу нимани англатишига аниқлик киритилмаган. Путин агар Украина Донецк, Луҳанск, Херсон ва Запорижжя областларининг маъмурий чегараларидаги барча ҳудудлардан қўшинларини олиб чиқса, Россия ўт очишни тўхтатишга тайёрлигини бир неча бор айтган. Россия Федерацияси Конституциясида қўшиб олингани расман қайд этилган бу ҳудудларнинг ҳеч бири Россия қўшинлари томонидан тўлиқ назорат қилинмайди.