28 феврал куни Humo Arena саройида Тошкент шаҳри ҳамда Тошкент вилояти учун интеллектуал кастинг бўлиб ўтади

«Заковат» интеллектуал клубига аъзо бўлиш истагида www.zakovat.tv сайти орқали 13 мингдан ортиқ аризалар келиб тушди. Шундан 11 111 нафар талабгор якка тартибда ариза топширган бўлса, 1 932 киши 322 та жамоага бирлашган ҳолда рўйхатдан ўтди.

Ҳудудий турнирлар ҳақида

Талабгорларнинг 72 фоизи Қорақалпоғистон Республикаси ҳамда вилоятлардан рўйхатдан ўтганини ҳисобга олиб, ҳудудий турнирлар ташкил этишга қарор қилинди. Шу орқали минглаб инсонлар узоқ масофалардан Тошкент шаҳрига келиб-кетишидаги оворагарчиликларнинг олди олинишига умид қилинган.

Тенглик бўлиши учун ҳудудий турнирларда ҳам худди Тошкентдагидек ғолиб жамоага 100 млн сўм пул мукофоти берилади. Асосий шартларидан бири, битта жамоа ёки шахс фақат битта ҳудудий турнирда қатнаша олади. Масалан, Тошкент минтақасида иштирок этган жамоа (шахс) бошқа ҳудудлардаги турнирларга қўйилмайди.

Ҳудудий турнирлар ўтказилиш жадвали

Ҳудудий турнирларни тахминан қуйидаги муддатларда ўтказиш режалаштирилмоқда:

• Самарқанд вилояти – март ойида;
• Қашқадарё, Сурхондарё ва Навоий вилоятлари – апрел ойида;
• Қорақалпоғистон Республикаси, Бухоро ва Хоразм вилоятлари – май ойида;
• Андижон, Наманган ва Фарғона вилоятлари – июн ойида;
• Сирдарё ва Жиззах вилоятлари – июл ойида.

Ҳудудий турнирларнинг аниқ саналари, тартиби ва шартлари қўшимча маълум қилинади. Шунингдек, ташкилий жараёнлар сабабли айрим муддатларга ўзгартиришлар киритилиши мумкин.

Клуб аъзолари ўртасида сўровнома

Рўйхатдан ўтган аъзолар учун қайси ҳудуддаги кастинг ва турнирларда қатнашиш қулайлигини аниқлаш ҳамда шу бўйича ташкилий масалаларни ҳал қилиш мақсадида кичик сўровнома ташкил қилинди.

www.zakovat.tv сайтида якка тартибда ва жамоа бўлиб рўйхатдан ўтган иштирокчилардан қуйидаги ҳавола орқали ўтиб, сўровномани тўлдириб беришлари илтимос қилинади.

Интеллектуал кастинг ҳақида

Якка тартибда рўйхатдан ўтган талабгорларни 6 кишилик жамоаларга ажратиб чиқиш мақсадида интеллектуал кастинг ташкил этилади. Кастингдан асосий мақсад аъзоларни ўтди ёки ўта олмади, деб саралаш эмас, балки шунчаки уларнинг бирламчи билим даражаларини аниқлаб олиш бўлади. Бу келгусида уларни турли лигаларда ва турнирларда иштирок этиши учун ҳам аҳамиятга эга.

Бошқача айтганда, кастингдан сўнг қониқарсиз натижа қайд этгани учун ҳеч ким клуб аъзолигидан чиқариб юборилмайди ёки турнирда қатнашиш ҳуқуқини йўқотмайди. Аммо юқори натижа қайд этганларга келгуси турнирларда кўпроқ имконият берилиши мумкин.

Интеллектуал кастингда жами 40та савол берилади. Уларнинг 30таси фактга асосланган саволлар бўлса, қолган 10таси мантиқий саволлар бўлади. Фактга асосланган саволларни ўйлаш учун 20 сония, мантиқий саволларга эса 1 дақиқа вақт берилади.

Ҳар бир иштирокчи ўзига берилган махсус титул варағига жавобларни ёзиши талаб этилади.

Кастинг натижалари 2 кун ичида маълум қилинади. Иштирокчилар ўз натижасини www.zakovat.tv сайти орқали аниқлаб олишлари мумкин бўлади.

Жамоалар қандай шакллантирилади?

Кастингдан сўнг барча иштирокчиларнинг рейтинги тузилади. Ана шу рейтинг асосида 6 кишилик жамоаларга тақсимлаб чиқилади. Бунда тақсимлаш рейтингдаги кетма-кетликка асосланган ҳолда амалга оширилади. Масалан, 1-ўриндан 6-ўрингача бўлган иштирокчилар битта жамоа, 7-12-ўринлардаги аъзолар кейинги жамоага бирлаштирилади ва ҳ.к.

Якка тартибда рўйхатдан ўтганлар рейтингдаги ўрнидан қатъи назар ўзаро келишган ҳолда ўз ташаббуси билан бир жамоага бирлаша олишмайди.

Иштирокчилар қайси жамоага тушгани ва жамоадошлари рўйхати билан www.zakovat.tv сайти орқали танишишлари мумкин бўлади.

Тошкент минтақаси учун интеллектуал кастинг

Тошкент шаҳри ҳамда Тошкент вилояти учун интеллектуал кастинг 28 феврал куни соат 17:00да Humo Arena саройида бўлиб ўтади. Саройга кириш соат 15:00дан бошланади.

Бунда рўйхатдан ўтиш жараёнида яшаш жойи сифатида иккита ҳудуддан бирини – Тошкент шаҳри ҳамда Тошкент вилоятини танлаган иштирокчиларнинг телефон рақамига SMS тарзда тадбир учун электрон таклифнома юборилади. Шунингдек, www.zakovat.tv сайти орқали ҳам тегишли шахсий маълумотларини киритган ҳолда электрон таклифномани юклаб олиш имкони яратилади.

Интеллектуал кастинг фақат якка тартибда рўйхатдан ўтганлар учун ўтказилади. Жамоа бўлиб рўйхатдан ўтганлар кастингдан ўтмайди, аммо улар ўша куни меҳмон сифатида иштирок этиши мумкин.

Интеллектуал кастингга турли сабабларга кўра кела олмаган иштирокчилар брейн-ринг турнирида қатнашиш ҳуқуқини қўлдан бой беради. Кастинг қайта ташкил қилинмайди.

Тошкентда таҳсил олувчи талабаларнинг иштироки

Айрим талабалар гарчи Тошкентдаги олий таълим муассасаларида таҳсил олишса ҳам, лекин рўйхатдан ўтаётган пайтда яшаш манзили сифатида ўзларининг доимий рўйхатдан ўтган манзилини (прописка) белгилашган. Бундай вазиятда улар қайси ҳудуддаги кастинг ва турнирда иштирок этади, деган саволлар келиб тушмоқда.

Тошкент шаҳри ҳамда Тошкент вилоятида таҳсил олаётган талабаларга гарчи бошқа ҳудудларни белгилаган бўлса ҳам, 28 феврал куни Тошкент шаҳридаги Humo Arena саройида бўлиб ўтадиган кастингда қатнашиш ҳуқуқи берилади. Бунинг учун улар ўша куни соат 15:00дан бошлаб фуқаролик паспорти билан бирга Humo Arena саройига келишлари ва ўша ердаги техник ёрдам кўрсатиш ходимларига мурожаат қилишлари керак. Техник ходимлар талаба ҳақиқатан сайтда рўйхатдан ўтганини текшириб, ўша ернинг ўзида тадбирга кириш учун таклифнома беришади.

Рўйхатдан ўтишга улгурмаганлар учун

www.zakovat.tv сайти орқали белгиланган муддатда рўйхатдан ўтишга улгурмаган шахслар ҳозирча Тошкент минтақасида бўлиб ўтадиган тадбирларда иштирок эта олишмайди. Аммо улар «Заковат» интеллектуал клуби томонидан келгусида ўтказиладиган бошқа тадбирларда қатнашишлари мумкин.