Чилонзор туманидаги Абдулқосим Эшон мадрасаси ички қисмига ўзбошимчалик билан ҳожатхона қурилиши оқибатида ёдгорликка 65,6 млн сўм зарар етказилган.
Тошкент шаҳри Чилонзор туманидаги Абдулқосим Эшон мадрасаси ички қисмига ўзбошимчалик билан ҳожатхона қуриб олингани аниқланди.
Бош прокуратура хабарига кўра, Маданий мерос агентлиги билан ҳамкорликда ўтказилган назорат тадбирларида «У.М.» жамоат фонди мансабдор шахслари томонидан XVI асрга оид Абдулқосим Эшон мадрасаси архитектура ёдгорлиги ички қисмига ҳожатхона қурилиб, коммуникация тармоқлари ўтказилгани маълум бўлган. Оқибатда ёдгорликка 65,6 млн сўм зарар етган.
Шунингдек, МЧЖ раҳбари О.А. ва бошқалар томонидан Наманган шаҳридаги XIX асрга оид “Сирли масжид” архитектура ёдгорлигининг қадимий ганчкор услубдаги кириш дарвозаси ва минораси тўлиқ бузиб ташланиб, ёдгорликка 554,4 млн сўм зарар етган.
Бундан ташқари, фуқаро М.К. томонидан Андижон шаҳридаги ХХ асрга оид Юнусхожи масжиди архитектура ёдгорлигининг 113,7 м3 қисми бузиб юборилиб, ёдгорликка 801,5 млн сўмлик зарар етказилгани аниқланди.
Аниқланган ҳолат юзасидан жиноят ишлари қўзғатилиб, тергов ҳаракатлари олиб борилмоқда. Назорат тадбирлари давом эттирилмоқда.
