Самарасиз деб топилган шифохоналар, парклар, стадионлар ва бошқа объектлар хусусий секторга берилиши мумкин

Ўзбекистондаги бир қатор ижтимоий муассасалар хусусий секторга берилиши мумкин. Бу – 30 август куни имзоланган давлат хусусий шерикликни ривожлантириш тўғрисидаги президент қарорида кўзда тутилган.

Қарорга кўра, самарасиз фойдаланиб келинаётган йирик шифохоналар, маданият ва спорт иншоотлари (шу жумладан, маданият саройлари, стадионлар, концерт заллари, истироҳат боғлари) хатловдан ўтказилади.

Хатлов натижаларига кўра, муассасаларни хусусий секторга давлат-хусусий шериклик асосида ўтказиш бўйича 2024 йил охиригача Вазирлар Маҳкамасига таклифлар киритилиши керак.

Ижтимоий объектларнинг “самарасиз фойдаланиб келинаётгани”га қандай баҳо берилиши ҳозирча маълум эмас.

Топшириқ ижросига иқтисодиёт ва молия вазири, соғлиқни сақлаш вазири, маданият вазири, спорт вазири, Давлат активларини бошқариш агентлиги директори ҳамда Қорақалпоғистон Республикаси Вазирлар Кенгаши раис, вилоятлар ва Тошкент шаҳар ҳокимлари масъул этиб белгиланди.

Эслатиб ўтамиз, ўтган бир неча йил ичида Тошкентдаги учта онкология шифохоналари, “Пахтакор” стадиони, Фарғонадаги “Ёшлар кўли” каби бир қатор ижтимоий масканларнинг сотиб юборилиши жамоатчилик босими тўхтатиб қолинган эди. Қолаверса, пойтахтдаги Абдулла Қодирий ва “Дўстлик” боғларининг инвесторга бериб юборилгани ҳам эътирозларга сабаб бўлган.