Педагог кадрлар учун малака синовларини ўтказиш жадвали тасдиқланди 

Умумий ўрта, ўрта махсус ва касб-ҳунар ҳамда мактабдан ташқари таълими муассасаларининг биринчи ва олий малака тоифали, етакчи ва бош ўқитувчи лавозимидаги ҳамда мазкур малака тоифалари ва лавозимларга талабгор педагог кадрлари учун малака (тест) синовларини ўтказиш жадвали тасдиқланди. Бу ҳақда Вазирлар Маҳкамаси ҳузуридаги Таълим сифатини назорат қилиш давлат инспекцияси жамоатчилик ва ОАВ билан алоқалар бўлими хабар қилди.

Жадвалга кўра, Тошкент шаҳри педагог кадрлари учун малака синовлари жорий йилнинг 17-22 июнь кунлари, Тошкент вилояти педагоглари учун 24 июнь-1 июль кунлари Таълим сифатини назорат қилиш давлат инспекциясининг биносида (Чилонзор тумани, Нурхон кўчаси 21-уй), Қорақалпоғистон Республикаси ва вилоятлар педагоглари учун эса 24 июнь-1 июль кунлари ҳудудлардаги барча қулайликлар ва замонавий ахборот коммуникацион технологиялари воситалари билан жиҳозланган Олий таълим муассасаларининг биноларида ўтказилади.

Малака (тест) синовларига пухта тайёргарлик кўриш ҳамда ўқитувчиларга қулайликлар яратиш мақсадида Таълим сифатини назорат қилиш давлат инспекцияси томонидан онлайн-синов тестлари 11-16 июнь кунлари (онлайн-репетиция) ўтказилади.

Аттестацияга жалб қилинган педагоглардан ушбу имкониятдан самарали фойдаланишларини, шунингдек, педагогог кадрлар аттестацияси тўғрисидаги маълумотларни http://pka.tdi.uz/ манзили орқали текшириб кўришларини ва маълумотларда ноаниқликлар аниқланганда, ҳудудий бошқарув органларига мурожаат қилишлари тавсия қилинмоқда.