Навоийда йил охиригача ичимлик суви билан таъминланганлик даражаси 78,5 фоизга етказилади

“Навоий сув таъминоти” МЧЖ вилоят аҳолисини асосан 3 та манба –“Дамхўжа” сув тармоғи, Аму-Бухоро магистрал канали ва локал сув тармоқлари ҳисобидан тоза ичимлик суви билан таъминлайди. Вилоятда жами 209 та ичимлик суви иншооти ва 3 640,3 км ичимлик суви қувурлари бор. Бу ҳақда “Навоий сув таъминоти” МЧЖ масъуллари иштирокида ўтказилган матбуот анжуманида маълум қилинди.

Таъкидланишича, МЧЖ томонидан вилоятдаги 460,1 минг нафар аҳолига марказлашган ҳолда ичимлик суви етказиб берилади. Аҳолининг қолган қисмини эса “Иссиқлик манбаи” ДУК ичимлик суви билан таъминлайди.

Жорий йилда вилоятда 273,4 км ичимлик сув тармоқлари ва 17 дона сув иншоотини қурилиш-реконструкция қилиш учун республика бюджетидан 65,2 млрд сўм маблағ ажратилган. Бугунги кунга қадар 50,6 млрд сўм маблағни ўзлаштириш ҳисобига 252 км ичимлик сув тармоқлари тортилган. Маҳаллий бюджет маблағлари ҳисобидан эса 2,4 млрд сўм ажратилиб, бугунги кунгача 22,4 км узунликдаги ичимлик суви қувури тортиб бўлинган.

Бундан ташқари, вилоятда “Обод қишлоқ” ва “Обод маҳалла” дастурлари асосида вилоят бўйича қарийб 53 млрд сўм маблағ эвазига 165,9 км ичимлик суви тармоқлари тортилиши ҳамда 15 та сув иншооти қурилиши режа қилинган. Бу орқали 20 минг нафардан ортиқ аҳоли илк бор марказлашган ичимлик суви билан таъминланади, 17 минг нафар фуқаронинг эса таъминоти яхшиланади.

“Навоий сув таъминоти” МЧЖ раҳбари Отабек Зариповга кўра, йил якунига қадар вилоятдаги 52 000 нафарга яқин аҳоли марказлашган ичимлик суви билан тўлиқ таъминланади. Натижада, вилоятда аҳолининг марказлашган ичимлик суви таъминланганлик даражаси 78,5 фоизга етади.