Энг азиз байрам – ҳадя улашиш учун муносиб кун

— Ҳар йили байрам арафасида мустақиллик кунига бағишланган тадбирлар, учрашувлар, ижодий кечалар, кўрик-танловлар ўтказиларди. Пандемия сабаб бу йил бундай учрашувлар ҳақида камроқ эшитдик. Бошқаларни билмадим-у, шахсан менда ана шу ҳолат сезилди. Нафақат сезилди, бирозгина дилим оғриди ҳам.

Мен шу юртнинг оддий фуқароси сифатида мустақилликни қанчалик қадрлашимни пандемия сабаб ўзим учун кашф қилдим. Қисқарган тарғибот тадбирлари-ю, учрашувлар борасидаги кемтикликни ўзимча тўлдиришга қарор қилдим.

Бугун қилган энг яхши ишим – фарзандларимга Мустақиллик байрами муносабати билан совғалар олиб бериш бўлди. Бу ишни умримда биринчи марта қиляпман. Энди ҳар йили шундай қилмоқчиман. Бунинг ҳам сабаби бор.

Ўзим болалигим давомида байрамлар ичида энг кўп янги йил байрамини кутганман. Сабаби оддий, бу кунда байрам совғалари олардик. Кечга бориб йил давомидаги энг тўкин дастурхон бизни кутарди. Қаранг, ана шу икки арзимас нарса учун шу байрамни йил давомида кутган эканмиз.

Нима учун Мустақиллик байрамини кутмаганмиз? Келинг, бошқачароқ ёндашамиз. Ҳозир ёшим 37да. Мен учун ҳеч қайси байрам совғаси қизиқмас, тўкин дастурхонга ҳам мутлақо ҳушим йўқ. Аммо янги йил кечаси яқинлашаверса, қандайдир энтикиш ҳис этаман ич-ичимда. Болалик хотираларимни қўмсайман.

Хўш, нима учун келажакда болаларимиз Мустақиллик кунини соғинмаслиги, бу кун яқинлашаверса, ич-ичидан хурсанд бўлмаслиги керак? Ҳаммаси ўз қўлимизда ва осон-ку!

Фарзандларимиз мустақиллик қандай неъмат эканини англаши учун улар камолотга етиши керак. Аммо унгача-чи?

Агар биз, катталар бугун Мустақиллик кунини уйда байрам қилсак, болаларимизга совғалар олиб берсак, уларга ширинликлар улашсак, болаларимиз гарчи ёш бўлса-да, мустақиллик қандайдир неъмат эканини ҳис эта бошлашади. Вақт ўтиб, улғайган сари мустақиллик нима эканини англашга ҳаракат қилаверади.

Хуллас, биз нимани қадрласак, улар ҳам шуни қадрлашади.

Мард бўлиб айтинг, шу юртнинг бир фуқароси сифатида мустақилликни қадрлай олишингизни бирор-бир восита билан фарзандингизга кўрсата олганмисиз? Унда ҳозир айни вақти.

Эҳтимол, жуда майда таклиф билдираётгандирман, аммо ана шу арзимас ишни ҳам қилаётганимиз йўқ шу вақтгача.

Демоқчиманки, бугун онгга қандайдир тантана сифатида муҳрланаётан бу сана, биздан кейинги авлод ҳаётида том маънодаги энг яхши байрамга айлансин. Муҳими, уларнинг қалбига энг асосий, муҳим байрам эканлигини сингдирайлик.

Энди шундай қилайликки, фарзандларимиз мустақилликни яхши кўришсин!