Ўзбекистонда коронавирус инфекциясининг кенг тарқалишини олдини олиш мақсадида ишлаб чиқилган карантин қоидаларини қасддан бузиш ҳолатлари ҳамон давом этмоқда.
29 март куни Фарғона шаҳридаги деҳқон бозорида Фарғона шаҳрида яшовчи Х.М. карантинли ва инсон учун хавфли бўлган бошқа юқумли касалликлар тарқалиши шароитида ички ишлар органларининг қонуний талабларига бўйсунмасдан тартибсизлик келтириб чиқаришга уринган.
Фарғона вилояти ИИБ матбуот хизмати хабар беришича, Х.М. бозор ҳудудида фуқароларга тушунтириш бераётган профилактика инспектори М.Казаков ва бошқа ходимларнинг қонуний талабларини бажармасликка даъват қилиб, оммавий тартибсизлик келтириб чиқаришга ҳаракат қилган. Шунингдек, ички ишлар органлари ходимлари ўз хизмат бурчларини бажаришига қаршилик кўрсатган. Карантин шароитида барча учун мажбурий амал қилаётган юзга ниқоб тақиш тартибига ҳам амал қилмаган.
«Якунда ушбу фуқарога нисбатан зарур ҳужжатлар тўпланиб, Фарғона шаҳар маъмурий судига юборилди.
Суд фуқаро Х.М.ни Маъмурий жавобгарлик тўғрисида кодекснинг 54 ва 195-моддасида кўрсатилган ҳуқуқбузарликни содир этган деб топиб, беш сутка маъмурий қамоқ жазоси тайинлади», дейилади хабарда.
