Россиялик қўшиқчи Жанна Фриске узоқ давом этган хасталикдан кейин, 40 ёшида ёруғ дунёни тарк этди. Бу маълумотни унинг отаси Владимир Фриске тасдиқлаган.
РИА Новости нашрининг хабар беришича, ўтган йилнинг январида мия cаратони ташхиси қўйилган хонанда 16 июнга ўтар кечаси вафот этди.
"Ҳа. Шундай бўлди", дейди марҳуманинг отаси Владимир Борисович.
Эслатиб ўтамиз, 2014 йилнинг январида Жанна Фрискенинг турмуш ўртоғи бўлмиш телебошловчи Владимир Шепелов рафиқасининг оғир хасталикка чалингани ҳақида Биринчи канал эфири орқали маълум қилганди. Шундан кейин хонанданинг мухлислари унинг даволаниши учун 68 млн рубль миқдорида маблағ йиғиб беришган, Фриске бу пулларнинг бир қисмини онкологик хасталикларга чалинган болалар учун ажратганди. Кейин эса унинг ўзи Нью-Йорк ва Шанхайдаги касалхоналарда даволанганди.
Маълумот учун, Жанна Фриске 1996 йилда "Блестящие" гуруҳи билан чиқишларидан кейин танилган, 2003 йилдан бошлаб яккахон хонанда сифатидаги фаолиятини бошлаганди. Фриске "Тунги қоровул" ("Ночной дозор"), "Кундузги қоровул" ("Дневний дозор") ва "Эркаклар нима ҳақида сўзлашади" ("О чем говорят мужчины") каби фильмларда ҳам суратга тушганди.
"Албатта ҳамма вафот этади. Аммо бу жуда эрта ўлим бўлди. У меҳрибон, самимий ва кучли аёл эди. Эй худойим, бу мен учун оғир жудолик бўлди. Жанна, сен у ерда бахтли бўлишингга ишончим комил. Яъни, сенинг бахтли йўлинг давом этади", дея ўз твиттерида ёзиб қолдиради Максим Фадеев.