Месси «Барселона»даги сўнгги матбуот анжуманида клубдан кетиши сабаблари, қачон қайтиши, «ПСЖ»га ўтиши мумкинлиги ва хотиралар ҳақида гапирди.
Футбол тарихидаги энг яхши футболчилардан бири (жуда кўпчиликнинг фикрича, энг яхши) Лионель Месси «Барселона»дан кетди. Бутун умри давомида бошқа жамоада ўйнашини тасаввур қила олмаганимиз Лео чиндан ҳам энди бошқа жамоада ўйнайди.
Клубдаги айрим шахсларнинг қарорлари ва Ла Лига раҳбариятининг аҳмоқона талаби сабабли испан футболи Мессисиз қолмоқда. Мессининг уйига айланган «Камп Ноу»да клуб тарихидаги энг муҳим инсон билан хайрлашув маросими бўлиб ўтди.
Лео анжуман ҳали бошланиб улгурмай йиғлаб юборди. Афсона у билан хайрлашгани келган оиласи, жамоа аъзоларини кўриб, камералар орқали миллионлаб мухлислари унга қараб турганини билгач, «Барселона»дан кетаётганини чинакамига тушуниб етган бўлса керак. Ахир шу кунгача жуда кўп мухлислар Месси «Мен барибир «Барселона»да қоламан» дейишини, ҳаммаси ҳазил бўлиб чиқишига умид қилганди. Мессининг ўзи ҳам охирги дақиқада Ла Лиганинг бебурд раҳбарияти залга кириб келиб, «Лео, сен қоласан, биз футбол тарихидаги энг катта хато бўлган қоидани ўзгартирдик» дейишини кутгандек эди гўё.
Бироқ бундай бўлиб чиқмади, Месси кетишини эълон қилишга мажбур бўлди. Аёли унга дастрўмол узатгач, Лео бироз тинчланди ва йиғламсираб «Ҳа, мен кетяпман, бутун умримни бағишлаганим Барселонамдан кетяпман», деди.
«13 ёшимда келгандим, энди хотиним ва уч болам билан кетяпман»
«Хайрли тонг. Тўғриси, гапира оламанми, йўқми – билмайман. Бу ерга, сизнинг олдингизга чиққач, нима дейишим мумкинлигини узоқ ўйладим, лекин ҳеч нарса чиқмади. «Барселона» билан хайрлашишга тайёрлана олмадим, ахир бу ҳақда ҳеч қачон ўйламаганман.
Бюрократик воқеалар билан эсда қолган тарих ортда қолди. Аммо бу йил кетишни истамагандим. Ҳа, ўтган йил кетиш истаги пайдо бўлган, аммо бу йил аниқ кетмоқчи эмасдим. Мен таътилдан қайтиб, янги шартнома имзолашни кутгандим, чунки ҳаммасини келишиб олгандик, ҳамма деталларни. Маошим 50 фоиз қисқаришига ҳам рози бўлдим, чунки Барселона менинг уйим. Клубда қолишни ҳаммадан кўп хоҳладим ва бунинг учун қўлимдан келганини қилдим, лекин бўлмади. Ла Лиганинг талаблари бунга йўл бермади.
Мен Барселонага жуда ёш вақтимда келгандим. Ўшанда 13 ёш эдим. Бугун эса 21 йил ўтиб рафиқам ва уч фарзандим билан кетишга мажбурман. Клубдаги ҳаммага раҳмат айтишим керак, бу ерда тасаввур ҳам қилиш қийин бўлган ажойиб кунларни бошдан ўтказдим. Умид қиламан, нима қилиб бўлса ҳам, «Барселона»га қайтиб, клуб дунёда энг яхши бўлиб қолишига ҳиссамни қўша оламан», деди Месси.
Нега Мессини олиб қола олишмади?
Гап шундаки, пандемия вақтида жуда қийин кунларни бошидан ўтказган «Барселона» катта қарзга ботган. Ўтган мавсумда футболчиларга тўланадиган маош даромаддан 10 фоизга кўп ва молиявий фейр-плей қоидаларига кўра бундай ҳолатга йўл қўйиб бўлмайди. «Барселона» Мессини олиб қолиш учун кўп маош оладиган бошқа бирор футболчини сотиши мумкин эди, аммо бундай қилмади. Шунингдек, Каталония клуби Мессини олиб қолиш учун ҳар хил айланма йўллардан ҳам фойдаланиши мумкин эди, аммо Лапорта берган ваъдасини бажармади. Оқибатда Месси кетди.
«Клуб билан Ла Лига талабларига кўра шартнома узайтира олмаслигимни айтишганда, устимдан совуқ сув қуйгандек бўлди. Ҳозиргача ўша ҳиссиётни хаёлимдан чиқара олмаяпман. Президент клуб катта қарзга ботгани ва яна қарз олишни истамаслигини айтди. Мендан фақат маошим 50 фоиз қисқаришига розилик сўрашди, мен иккиланмай рози бўлдим. Кейинчалик яна 30 фоизга қисқартиришни сўрашгани ва мен рози бўлмаганим ҳақидаги гаплар – ёлғон. Клуб сўраган ҳамма ишни қилдим.
Менинг атрофида жуда кўп ёлғон миш-мишлар тарқалади. Мухлисларга эса доим ҳақиқатни айтганман, ахир улар билан биргаликда ўсдим, бирга хурсанд бўлдик, менга жуда кўп нарса берган мухлисларни алдай олмайман.
«ПСЖ»га ўтяпманми? Расмий баёнот эълон қилингач, кўп клублар мен билан алоқага чиқишди. «ПСЖ» вариантлардан бири, лекин ҳали ҳеч ким билан келишувга эришмадим. «ПСЖ»даги йигитлар билан тушган суратим ҳеч нарсани англатмайди. Ди Мария ва Паредас билан Ибицада учрашишга келишдик. Кейин Неймар телефон қилди, у ҳам Ибицада экан. Кейин уларни уйга таклиф қилдим ва бирга суратга тушдик. Бунга жуда кўп эътибор бериш шарт эмас, улар менинг дўстим», деди Лео.
Месси ҳали кўп соврин ютмоқчи эканини айтиб, собиқ жамоадоши Дани Алвесга етиб олишга уринишини айтиб, ҳазиллашди.
«Мен яна битта ЕЧЛни ютишни истайман. Биз икки марта жуда яқин келгандик, бир сафар «Ливерпуль»га, бир сафар Гвардиола билан «Челси»га яримфиналда енгилдик. Менинг мақсадим совринлар ютиш борасида Дани Алвесга етиб олиш, унинг кеча олимпиададаги ютуғидан хурсанд бўлдим», деди Месси.
Маълумот учун, Дани Алвес Токио олимпиадасини ҳам қўшиб ҳисоблаганда 43та соврин ютди ва у тарихдаги энг совриндор футболчи ҳисобланади. Мессида эса «атиги» 35та соврин бор.
Месси сўзи якунида «Барселона»нинг таркиби кучли эканини айтди: «Ҳеч ким клубдан муҳим бўла олмайди. Футболчилар «Барселона»га келишда давом этади. Ҳозир ҳам жуда яхши таркиб йиғилган».
Шу тариқа, Месси билан хайрлашув матбуот анжумани якунланди. Залда йиғилган барча Леони тик турган ҳолда қарсаклар билан кузатиб қўйди.
