Kun.uz: 2015 йилнинг 1 май куни Меҳнат ва аҳолини ижтимоий муҳофаза қилиш вазирлигида АҚШнинг Ўзбекистондаги элчиси Памела Спратлен ва вазирлик раҳбари Азиз Абдуҳакимов ўртасида учрашув ўтказилди.
Вазирлик
матбуот хизмати тарқатган хабарномада айтилишича, учрашув чоғида Спратлен хоним вазирликнинг аҳолини иш билан таъминлаш ва ижтимоий ҳимоя қилиш бўйича республика миқёсида олиб борилаётган ишлар билан танишиб чиқди. Вазир ҳукумат касб-ҳунар коллежлари ва академик лицейлар битирувчиларини иш билан таъминлашга алоҳида эътибор қаратаётганини таъкидлаб ўтди. Бу масалаларни ҳал қилиш учун ҳар йили Олий Мажлис Сенати ва Қонунчилик Палатаси томонидан тасдиқланадиган тегишли дастур қабул қилиниб, унда кадрларни тайёрлаш ва қайта тайёрлаш бўйича комплекс чора-тадбирлар ишлаб чиқилади.
Азиз Абдуҳакимов халқаро ҳамкорлик масалаларига тўхталар экан, Халқаро Меҳнат Ташкилоти, Жаҳон банки билан самарали ҳамкорликни йўлга қўйилганини, BetterCottonInitiative дастурини жорий қилиш борасида музокаралар олиб борилаётганини, БМТ ТД билан ҳамкорликда муассасани институционал ислоҳ қилиш бўйича тавсиялар ишлаб чиқилаётганини айтиб ўтди.
Ўз навбатида, Спратлен хоним АҚШ мутахассислари Ўзбекистонда бўлаётган ўзгаришларни диққат билан кузатаётганини, икки давлат ўртасидаги ҳамкорлик ривожланиб бораётганини мамнуният билан таъкидлаб ўтди.
