Czech Airlines йўловчи самолёти двигателларидан бири ишламай қолганлиги туфайли Гамбургда режадан ташқари қўнишни амалга оширди. Бу ҳақда Чехия авиакомпаниясига таяниб, ТАСС хабар берди.
Икки моторли турбовинтли ATR 42 самолёти Биллунн (Дания) – Прага йўналиши бўйича парвоз қилаётганди. Бортда 30 нафар йўловчи бўлган.
Биллунн аэропортидан учишда муаммолар кузатилмаган, самолёт баландликка кўтарилганидан сўнг двигатель номаълум сабабларга кўра ишламай қолган. Экипаж самолётни яқин атрофдаги ҳаво бандаргоҳига йўналтиришга қарор қилган. Қўниш вақтида ҳеч ким жабрланмаган.
CSA двигатель ишламай қолганининг сабабини аниқлаш ва ҳаво кемасини таъмирлаш учун Гамбургга техниклар жамоасини жўнатди.