Россия бош вазири Дмитрий Медведев Россия президенти Владимир Путин ўтказган йиғилишда Apple Watch ақлли соатларини қўлига таққан ҳолда келди. Бу ҳақда “Комсомольская правда” газетасининг журналисти Дмитрий Смирнов ўзининг твиттерида маълум қилди.
“Медведев бўлса Путин билан йиғилишга Apple Watch соатларида келди. Камтарона ўтириб, ҳеч кимга бу ҳақда оғиз очмади”, деб айтиб, бош вазирнинг расмларини илова қилиб қўйди Смирнов.
Дмитрий Медведев Apple компаниясининг электрон маҳсулотлари ишқибози ҳисобланади, бош вазир бир нечта iPhone ва iPad ларга эга. Бундан ташқари, Медведев 2010 йилда АҚШга президент сифатида ташрифи пайтида Apple қароргоҳида бўлган ва Стив Джобсдан совға сифатида 4 та iPhone олган.