Чеченистон раҳбари Рамзон Қодировнинг фикрича, мухолифатчи сиёсатчи Борис Немцовнинг ўлдирилишида Украина хавфсизлик хизмати ва АҚШ изини қидириш керак.
“Фикримча, жиноят изларини Чеченистонда эмас, Украинада, УХХ, у орқали эса АҚШда қидириш керак. Жиноят ортида ҳозирликда Украинанинг аллақандай “Жоҳар Дудаев номли батальон”ига қўмондонлик қилаётган Адам Осмаев турган бўлиши мумкин”, – унинг сўзларини келтиради Интерфакс.
Шунингдек, Қодиров жиноятга ўзининг алоқадорлиги ҳақидаги гапларни инкор қилди:
“Гўёки мен Немцовни ўлдириш керак деган эмишман. Бу ёлғон! Мен уни ўлдириб нима қиламан? У бизга нима қилди? У бизга халақит берган бўлмаса. У ҳатто кўп йилдан буён бу ерга (Чеченистонга) келмаган ҳам эди. Уни охирги марта ўн тўрт йил муқаддам Гудермесда кўрган эдим”.
