Донецк осмонида ҳалокатга учраган "Боинг" бўйича текширувлар давом этмоқда 11 июль куни Малайзия бош вазири Нажиб Раззоқ ўша ҳалокат қурбонларини хотирлаш маросими вақтида бу фожиа айбдорлари топилишини маълум қилди. Бу ҳақда ТАСС нашри хабар берган.
"Биз бармоғимиз билан кўрсатмаймиз. Лекин, биз бу фожианинг асл айбдорлари кимлигини аниқлашга яқин келиб қолдик. Малайзия бу ҳалокатни содир этганларнинг ваҳшийлигини, шафқатсиз ва қолоқлигини қаттиқ қоралайди", дейди бош вазир.
Унинг қайд этишича, айбдорларни аниқлаш бўйича текширувлар шу йилнинг охирига қадар давом эттирилади.
Нажиб Раззоқ марҳумларни хотирлаш маросимига йиғилганларга ўз ҳукумати бу ишни очиқ қолдирмаслигига ишонтирган.
"Биз бу жараёнда ёрдам бериши мумкин бўлган барча билан ҳамкорлик қилишга тайёрмиз", дейди у.
Ҳодиса бўйича текширув ишларига Нидерландия раҳбарлик қилмоқда. Бу жараёнга Малайзия билан биргаликда Украина, Россия, АҚШ, Буюк Британия ва Австралия томонлари ҳам жалб этилган. Нидерландия Хавфсизлик Кенгаши ўз текширувларини якунлаган ҳамда хулосаларни ҳамкор томонларга юборган. Бу ҳисобот шу йилнинг октябрида эълон қилиниши режалаштирилган.
Маълумот учун, MH17 рейси бўйича Амстердамдан Куала-Лумпурга учиб кетаётган самолёт Украинанинг Донецк вилоятида 2014 йилнинг 17 июлида фалокатга учраган. Самолётда 298 нафар йўловчи бўлган. Улардан кўпчилигини Нидерландия фуқаролари ташкил қилган. Киев ушбу фалокатда айирмачиларни айблаган, бироқ улар самолётни бундай баландликда уриб туширадиган воситаларга эга эмасликларини айтиб, бу айбловни инкор этишган. Нидерландияда 2014 йилнинг сентябрида самолёт “кўп сондаги юқори энергетик объектларнинг ташқи таъсиридан олинган шикастланишлар” оқибатида қулаганини тасдиқловчи дастлабки ҳисобот чоп этилган эди. Бироқ бу объектларнинг манбасини аниқлашга муваффақ бўлинмаган.