АҚШ президенти Барак Обама ва унинг ўринбосари Жо Байден Украина бош вазири Арсений Яценюкнинг олиб бораётган ислоҳотларига ижобий баҳо берди. АҚШ раҳбарлари унга Россияга қарши санкцияларнинг давом эттирилишини ваъда қилди.
Душанба куни Яценюк ҳукумат делегациясига раҳбар сифатида Вашингтонда бўлди ва Украина-АҚШ инвестицион форумида иштирок этди. Протокол бўйича Яценюк Жо Байден билан суҳбат ўтказаётганда уларга Барак Обама ҳам қўшилди.
АҚШ етакчилари Украинада олиб борилаётган ислоҳотларга ижобий баҳо бериб, Минск келишувлари амалга ошгунга қадар Россияга нисбатан чекловлар сақланиб қолишини таъкидлаб ўтдилар. Бундан ташқари, Украинанинг Минск келишувларини бажариб бораётгани, хусусан, марказлаштиришни тугатиш бўйича конституцион ўзгаришлар парламент муҳокамасига киритилгани мамнуният билан қайд этилди.
