Ўтган ҳафта Япониянинг йирик туристик компаниялари вакилларидан иборат делегация Ўзбекистонга ташриф буюргани ҳақида ахборот берилган эди. Делегация таркибида Япония туристик агентликлар уюшмаси (JATA), Hankyu Travel, Travel Plaza Japan, Foresight Marketing агентликлари раҳбар ходимлари, Asahi-TV, Travel&Life, JIJI Press ва Mainichi Shimbun сингари йирик ОАВ вакиллари бор эди.
Ташриф чоғида делегация Ўзбекистоннинг туристик салоҳияти билан таништирилди. Шунингдек, Бухоро, Самарқанд сингари шаҳарларнинг асосий туристик объектлари бўйлаб саёҳат уюштирилди. Меҳмонлар Сурхондарё ва Хорезм вилоятларига сафар уюштириб, у ердаги туристик инфраструктуранинг ривожлантирилаётганига гувоҳ бўлдилар.
Ташриф якунларига кўра делегация вакиллари Ўзбекистон туристик салоҳиятини ривожлантириш бўйича тавсияларини таклиф этишди. Шунингдек, “Ўзбектуризм” миллий компанияси раҳбарияти JATA раҳбари ўринбосари Ж. Кикум билан музокаралар ўтказди. Музокаралар якунига кўра шу йилнинг октябрида икки ташкилот ўртасида ҳамкорлик меморандумини имзолашга келишиб олинди.
