Ҳиндистоннинг Мумбай шаҳар суди 2006 йилда поездда портлаш содир этганликда айбланган 12 нафар жиноятчидан 5 нафарини ўлим жазосига ҳукм этди. Бу ҳақда The Times of India нашри хабар тарқатмоқда.
Манбанинг ёзишича, мазкур воқеа 2006 йил 11 июль куни Мумбай шаҳри яқинида ҳаракатланаётган поездда содир этилган бўлиб, бир неча портлашлар натижасида 188 нафар одам ҳалок бўлган, 829 йўловчи турли даражадаги тан жароҳатлари билан жабр кўрганди.
Икки ҳафта муқаддам 12 нафар гумондор шахснинг барчаси мазкур воқеада айбдор деб топилганди. Уларнинг беш нафари ўлим жазосига ҳукм қилинган бўлса, қолган етти нафар умрбод қамоқ жазосига ҳукм қилинган.
Беш нафар ўлимга ҳукм қилинганлар поездга бомба ўрнатганлар бўлса, умрбод қамалганларнинг иккитаси портоловчи моддалар тўпламини поездга етказиб берган, яна бир қамоқ жазосига ҳукм қилинган жиноятчи бомбага таймер ва электрон схемани ўрнатиш билан шуғулланган.