Ғарбнинг бир қатор оммавий ахборот каналлари Россия бюджетининг “абрамович”ларга конвертациясини амалга оширдилар. Бу шартли бирлик бўлиб, 1 “абрамович” 7.9 млрд долларга тенгдир (Forbes маълумотларига қараганда, бугунги кунда тижоратчи Роман Абрамовичнинг бойлиги мана шундай баҳоланади).
Ҳисоб-китобларга қараганда, Россия ғазнасининг 2016 йилдаги даромади 25.2 “абрамович”ни ташкил қилади.
Бюджет параметрлари “барчага тушунарли ва мураккаб материални ўзлаштириш билан боғлиқ қийинчиликлар туғдирмайдиган” бир шаклда ҳисоблаб ва ўрганиб чиқилди. Даставвал макроиқтисодий бирликлардан фойдаланиш режалаштирилган эди (“прохоров” ва “дерипаска”лар сингари), лекин россияликлар олигарх деганда биринчи навбатда Абрамовични тушуниши инобатга олинди.
2016 йилда бюджет 25.2 “абрамович”га бойиши билан бирга, харажатлар 29.5 “абрамович”ни, камомад эса 4.3 “абрамович”ни ташкил этади. Ижтимоий сиёсатга 8.13, мудофаага 5.77, таълим тизимига 1.06, соғлиқни сақлашга 0.89, маданиятга 0.16 “абрамович” сарфланиши режалаштирилган. Шунингдек, йил охирида Захира жамғармасида 2.25 “абрамович” бўлиши айтилмоқда.
Эслатиб ўтамиз, 15 декабрь куни Россия президенти Владимир Путин имзолаган 2016 йилнинг федерал бюджети ҳақидаги қонунга мувофиқ даромад 13.738 трлн, буромад 16.099 трлн рубль ҳажмида режалаштирилган. Камомад 2.36 трлн рублни (ЯИМнинг 3 фоизи) ташкил этилиши кутилмоқда. Бюджет Urals нефтининг бир баррели нархи 50 долларни ташкил этишига асосланиб тузилган.