“Тақдир ҳазили” фильми 40 ёшга тўлди

2016 йилнинг 1 январида “Тақдир ҳазили ёки қушдай енгил бўлинг” фильмининг кенг томошабинлар оммасига тақдим этилганига 40 йил тўлди. Ушбу фильм МДҲ давлатларида Янги йил байрамининг нишоналаридан бирига айланиб улгурган машҳур картинадир.

Фильмга асос вазифасини бажарган пьеса 1969 йили Эльдар Рязанов ва Эмиль Брагинский томонидан ёзилган. Москвадаги бирорта театр уни намойиш этмаган, лекин жойларда катта шуҳратга эришган.

Рязанов ва Брагинский пьеса асосида сценарий тайёрлаган, аммо давлат кино қўмитаси уни ичкиликбозлик тарғиботига йўйиб, узоқ вақт қабул қилмаган. Шунда муаллифлар постанвокани телевидениега таклиф қилди, раҳбариятга ғоя маъқул тушди, натижада унинг буюртмасига кўра фильм “Мосфильм”да суратга олинди.

Фильмнинг телепремьераси 1976 йилнинг 1 январида бўлиб ўтди. У Марказий телевидениенинг Биринчи дастури орқали намойиш этилди. Биринчи намойиш аудиторияси 100 млн томошабинни тўплай олди.

Эльдар Рязановнинг таъкидлашича, тақдимотдан сўнг унга кўплаб миннатдорчилик хатлари келиб тушган. Бир неча ойдан сўнг фильм қайтадан намойиш этилган, кинотеатрлар учун картина қайта ишланган.

2007 йили Тимур Бекмамбетов фильмнинг давомини суратга олди. Унинг қаҳрамонлари биринчи фильм асосий образларининг фарзандларидир. Эльдар Рязанов ҳар икки фильмда ҳам бир хил ролни ижро этди – ширакайф бош қаҳрамон самолётда унинг елкасига бош қўйиб ухлаб қолади.
Эслатиб ўтамиз, фильм муаллифи Эльдар Рязанов ўтган йилнинг 30 ноябрь куни оламдан ўтди.
Картина қаҳрамони Женя Лукашин истиқомат қиладиган 3-Қурувчилар кўчаси 60-йиллардан Мария Ульянова номи билан атала бошланган. Бош қаҳрамон яшаб келган уй шаҳарни янгилаш дастури доирасида бузиб ташланган.