Samsung’нинг CES 2016да тақдим этган янгиликлари

Samsung компанияси Лас-Вегасда ўтаётган CES 2016 кўргазмасида бир қатор янги ускуналарни намойиш қилди. Қуйида уларга қисқача тўхталамиз.

Galaxy TabPro S Windows 10 негизида ишлайдиган, клавиатурали ғилофга эга планшетдир. Техник тавсифи: 12 дюймли 2160×1440 пиксель ечимли Super AMOLED экрани, Intel Core M процессори, 4 ГБ RAM, 128 ёки 256 ГБ хотира, иккита 5 мегапикселли камера, Wi-Fi 802.11 a/b/g/n/ac MIMO, Wi-Fi Direct, LTE, NFC, Bluetooth 4.1 модуллари, HDMI ва USB Type-C учун адаптер. Планшет вазни 693 граммни, корпус қалинлиги 6.3 мм ни ташкил қилади. Galaxy TabPro S қачон сотувга чиқарилиши, нархи неча пул бўлиши номаълум.

Notebook 9 сериясига 13.3 ва 15 дюйм диагоналли FullHD-экранларига эга иккита ноутбук кирди. Иккаласи ҳам Windows 10да ишлайди, шунингдек, олтинчи авлод Intel Core процессорлари, 8 ГБ RAM ва 256 ГБ гача хотира билан таъминланган.

Chromebook 3 Samsung компаниясининг янги хромбукидир. У11,6 дюйм диагоналли, 1366×768 пиксель ечимли экран, Intel Celeron N3050 процессори, 2 ёки 4 ГБ RAM ҳамда 11 соат ишлай оладиган аккумулятор билан таъминланган. Унинг нархи ҳам маълум эмас. Хромбукнинг илгариги модели 400 доллар туради.

UBD-K8500 Blu-ray дискларини ўқувчи плеер бўлиб, 4K ечимини қўллаб-қувватлайди. Ҳозирча бундай ускуналар учун етарли контент йўқ, аммо Twentieth Century Fox студияси 2016 йилда 30та эски фильмни шу ечимда қайтадан чиқаришга ваъда бермоқда. Плеер март ойида сотувга чиқарилади.

Samsung Gear S2 соатларининг иккита янгиланган версиясини таклиф қилмоқда: улардан бирининг корпусига тилла суви юритилган, фил суяги рангидаги тери тасмага эга бўлса, иккинчисининг корпуси платина билан қопланган, тери тасмаси эса қора рангда.

Family Hub Fridge фотокамералар ҳамда Gorilla шишаси билан ҳимояланган улкан экранга эга музлаткичдир. У Tizen базасида ишлайди, ҳар замонда музлаткич ичини суратга олади (бу ҳақдаги кўрсатмани смартфон орқали берса ҳам бўлади), шунингдек, интернет орқали керакли маҳсулотларни буюртма қилади. Музлаткич колонкаларга ҳам эга бўлиб, у орқали мусиқа эшитиш мумкин. Family Hub Fridge нархи 5 минг доллардир; у май ойида сотувга чиқарилади.