Россиялик ҳайдовчилар энг ишончли машина русумларини танлашди

Экспертлар, россиялик автомобиль фойдаланувчиларининг фикрича, энг ишончли бўлган машина маркаларини рейтингини тузиб чиқдилар. “Автостат” таҳлилий агентлигининг маълум қилишича, сўровнома Drom.ru сайтининг фаол фойдаланувчилари орасида ўтказилган.

Айтилишича, “Россия авто эгаларининг истеъмол майллари” номли ҳисоботни тайёрлаш учун таҳлилчилар 2015 йилнинг октябрь ойида сўровнома ўтказишган. Анкетада таклиф қилинган брендлар орасида энг ишончлисини танлаш талаб қилинарди.

Рейтингнинг дастлабки етти ўрни Япония брендларига насиб қилди. Кучли учталикни Toyota (21.1 фоиз овоз), Mitsubishi (20.9 фоиз) ва Subaru (20.6 фоиз) ташкил қилди. Немис брендлари эса, респондентларнинг фикрича, у даражада ишончли эмас: Volkwagen (14.4 фоиз) 11-позицияни эгаллади; Mercedes-Benz (12.8 фоиз) — 14, Opel (10.5 фоиз), Audi (9.5 фоиз) ва BMW (8.8 фоиз) — 17, 18 ва 19-ўринларга мос кўрилди.