Кейт Уинслет ДиКаприонинг “Оскар” олишига ишонмоқда

Актриса Кейт Уинслет актёр Леонардо ДиКаприо навбатдаги “Оскар” мукофоти тақдимотида мукофот олишига ишонмоқда, деб хабар бермоқда Reuters ахборот агентлиги.

ДиКаприонинг номзоди ушбу мукофотга бешинчи маротаба қўйилмоқда, бироқ ханузгача у бу мукофотни қўлга кирита олмаган. Ҳозирда у “Омон қолган” фильмидаги бош роли учун олтин ҳайкалчани қўлга киритишга номзодлик қилмоқда.

ДиКаприо билан “Титаник” ва “Ўзгаришлар йўли” суратларида роль ижро этган Уинслет актёр бу гал охир-оқибат ютишига ишонмоқда. “Фикримча, барча унинг бу мукофотни ютишини истаяпти, бу ажойиб бўларди”, деб айтди Уинслет.

Уинслетнинг айтишича, унга “бироз мушкулроқ бўлмоқда”, чунки “Энг яхши актёр” йўналишида “Стив Жобс” фильмида бош ролни ўйнаган актёр Майкл Фассбендернинг ҳам номзоди бор. Актриса ҳам бу суратда ўйнаган. У Фассбендернинг ижросини “улкан” деб атади, бироқ “бу йил эҳтимол Леонинг йили бўлади” деб қўшимча қилди.

Уинслетнинг ўзи эса “Энг яхши иккинчи даражали актриса” йўналишида “Оскар”ни қўлга киритиши мумкин.

ДиКаприо “Омон қолган”даги роли учун “Олтин глобус” ва АҚШ кинотанқидчилари мукофотини олишга улгурди.