Янгиқўрғонда аҳолидан ноқонуний пул йиғиб юрган МФЙ котибаси қўлга олинди

Наманган вилояти Янгиқўрғон туманида аҳолидан ноқонуний пул йиғиб юрган МФЙ котибаси қўлга олинди. Бу ҳақда “Ҳуқуқ” нашри хабар бермоқда.

Айтилишича, маҳалла фуқаролар йиғинида котиб бўлиб ишлаб келган Мунира Қобулова хонадонларни айланиб, айрим оилаларга пул эвазига ўз “хизмат”ларини таклиф қилган.

Жумладан, Сора Расулованинг уйига бориб, унга бериладиган нафақа муддати туганини айтиб, 150 минг сўм эвазига муддатни узайтириб беришни ваъда қилган. Аёл унга пул бериб юборган.

Аммо бир неча кундан банкка бориб, нафақахўрлар рўйхатида ўзининг йўқлигини билган ва тегишли идораларга мурожаат қилган.

Қобулова қўлга олинган. Тергов асносида у бундай йўл билан кўплаб инсонларни алдагани ошкор бўлган.