“Uzbek Tigers” амалдаги чемпион “Аstana Arlans”ни мағлуб этди

Пойтахтимиздаги “Ўзбекистон” спорт мажмуасида бокснинг янги йўналиши Бутунжаҳон бокс серияси, яъни WSB ҳамда APB бўйича ташкил этилган бокс оқшоми якунланди. Турнирнинг биринчи куни “Ўзбек йўлбарслари” жамоаси Пуэрто-Риконинг “Puerto Rico Hurricanes” боксчиларини 5:0 ҳисобида мағлуб этишганди.

Кеча оқшом мусобақада илк маротаба иштирок этаётган “Ўзбек йўлбарслари” жамоаси асосий рақиб – мусобақанинг амалдаги ва шу билан икки карра ғолиби Қозоғистоннинг “Аstana Arlans” жамоасига қарши рингга кўтарилди.

Муросасиз кечган баҳсда ҳамюртларимиз кучли рақибларини 4:1 ҳисобида мағлуб этишди. 49 кг вазн тоифасида рингга кўтарилган жамоамиз етакчиси Хасанбой Дўсматов рақиби Темиртас Жусуповни 3:0 (50:40, 50:45, 50:45) ҳисобида енгди. 56 кг вазндаги чарм қўлқоп устамиз Абдулҳай Шораҳматов эса Меирболат Тоитовдан худди шу ҳисобда устун келди.

64 кг вазнда рингга чиққан Фазлиддин Мелибоев Асхат Уалихановни 3:0 (49:46, 49:46, 49:46) ҳисобида таслим этди. Бу билан жамоамиз амалдаги чемпионларни муддатидан аввал мағлуб этишга муваффақ бўлишди. 75 кг вазндаги боксчимиз Хуршид Норматов Мейирим Нурсултановга 0:3 (47:48, 47:48, 47:48) ҳисобида имкониятни бой берди. 91 кг вазндаги Мирзабек Ҳасанов эса Еркин Мухамеджанни 3:0 (48:47, 48:47, 48:47) ҳисобида доғда қолдирди.

APB йўналишида ташкил этилган ҳар икки жангда ҳам боксчиларимиз рақибларини мағлуб этишнинг уддасидан чиқишди. 81 кг вазн тоифасидаги чарм қўлқоп устамиз Зуҳриддин Маҳкамов руминиялик Александр Мачедонни 3:0 (60:54, 60:53, 60:54), +91 кг вазндаги Улуғбек Мубинов эса муросасиз кечган жангда хорватиялик Марин Миндолевични 3:0 (58:56, 58:56, 58:56) ҳисоби билан мағлубиятга учратди.