Қирғизистоннинг Svoboda.kg ахборот-таҳлилий сайти Ўзбекистон Республикасида бўлажак Президентлик сайлови хусусида мақола эълон қилинди.
Унда айтилишича, Ўзбекистон Республикаси Марказий сайлов комиссияси (МСК) «Ўзбекистон Республикаси Президенти сайлови тўғрисида»ги Қонуннинг 24-моддаси ва «Ўзбекистон Республикаси Марказий сайлов комиссияси тўғрисида»ги қонуннинг 5-моддасига мувофиқ, 2016 йилги президентлик сайловида иштирок этиш юзасидан ариза топширган сиёсий партияларнинг мурожаатлари ва ҳужжатларини ўрганиб чиқиб, Ўзбекистон Республикаси Президентлиги учун сайловларга Ўзбекистондаги 4та сиёсий партияга ҳам рухсат берган.
Мақолада қайд этилишича, МСК сиёсий партияларнинг барча ваколатли вакилларига шу ҳақдаги гувоҳнома ва ўрнатилган намунадаги имзо тўплаш варақаларини топширган.
Порталнинг ёзишича, ЎзЛиДеП партиясидан – Шавкат Мирзиёев, Ўзбекистон «Миллий тикланиш» миллий демократик партиясидан – Сарвар Отамуратов, Ўзбекистон ХДПдан – Ҳотамжон Кетмонов ва «Адолат» социал-демократик партиясидан – Наримон Умаров номзоди илгари сурилган. Мазкур номзодлар, 2016 йил 14-15 октябрь кунлари бўлиб ўтадиган партияларнинг қурултой ва съездларида тасдиқланиши лозим.
Svoboda.kg нашрининг таъкидлашича, Ўзбекистондаги президентлик сайловолди кампанияси ошкоралик ва шаффофликка асосланган. МСКнинг фаолияти эса, қонунга тўлиқ риоя қилинган ҳолда ҳамда сайловларга тайёргарлик кўриш ва ўтказиш бўйича Дастурга мувофиқ ташкил этилган, деб ёзмоқда jahonnews.uz сайти.
