УЕФА аёллар ўртасидаги Евро-2017 U-17 мусобақаси ўйиндан кейинги пенальтилар сериясининг инқилобий ўзгаришни синовдан ўтказади. Бу ҳақда ташкилот расмий сайти хабар тарқатди.
Манбага кўра, дастлабки пенальтидан сўнг, кейинги жамоа битта эмас, иккитадан пенальтини амалга оширади. Аниқроқ айтадиган бўлсак, биринчи жамоа дастлабки зарбани берганидан сўнг, кейинги зарбаларда жамоалар кетма-кет иккитадан зарба тепишади.
Бунинг натижасида биринчи зарбани йўллаётган жамоа эга бўладиган руҳий устунликка барҳам берилиши кўзда тутилган. Футбол ассоциациялари халқаро Кенгаши (IFAB) дастлабки зарба голга айланса, иккинчи зарбани йўллаётган жамоа жуда катта босим остида қолиб кетаётганини таъкидлаб келмоқда.
Маълумот учун, теннисда сетдаги ҳисоб 6:6 кўриниши олганида тай-брэк ўтказилади ва қоидага кўра, битта спортчи биринчи зарбани амалга оширгач, кейинги уринишларда спортчилар иккитадан тўп узатишни амалга оширишади. Футболдаги янги қоида ҳам шунга асосланган бўлиб чиқмоқда.
