2018 йил 12 апрел куни, Ўзбекистондаги АҚШ элчиси Памела Спратлен хоним Фарғона водийси бўйлаб ўз ташрифи давомида МЧЖ «Coca-Cola Ichimligi Uzbekistan, Ldt.» Ўзбек-Америка қўшма корхонасининг Наманган филиалига ташриф буюрди.
Корхонанинг Наманган филиали 1997 йилдан буён водий аҳолисини дунёга машҳур бўлган бренд - «Coca-Cola» салқин ичимликлари билан таъминлаб келмоқда.
Элчини, компаниянинг Бош директори Норматов Фахриддин Тўйчиевич ва Наманган вилояти ҳокимлиги вакиллари кутиб олдилар.
Ташриф давомида корхонанинг ишлаб чиқариш жараёни, ишчи ходимларга яратилган шарт-шароитлар, маҳсулот сифатига бериладиган эътибор ҳақида маълумот берилди.
Жорий йилнинг биринчи чорагида корхонага 1 миллион евродан ортиқ инвестиция киритилган бўлиб, Германиянинг KRONES компанияси томонидан ишлаб чиқарилган, замонавий шиша идиш ювиш ускунаси ўрнатилганлиги ҳақида ҳам маълумот берилди.
Спратлен хоним ишлаб чиқариш жараёни ва Наманган заводининг умумий ҳолатини ва 130 йилдан буён салқин ичимликлар бозорида машҳур бўлиб келаётган «Coca-Cola» ичимлигининг сифатига алоҳида эътибор берилаётганлигини юқори баҳолади.
АҚШ элчиси ташрифи ниҳоясида ўз мамнуниятини ифодалаган ҳолда, корхона ходимларига салқин ичимликлар бозорида юқори ўринларга эришишида омад тилаб, ўзаро мустаҳкам ҳамкорлик алоқаларини ўрнатиш истагини билдирди.
Маълумот ўрнида корхонанинг Наманган филиалида 260дан ортиқ ишчи ва ходимлар ишлаб келмоқда ва корхона 4 та халқаро ISO 9001:2008, ISO14001:2004, OHSAS 18001:2007 ва FSSC 22000 стандартлар бўйича сертификатларга эга.
